Uair na cinniúna d’fhoireann McCarthy agus na Lochlannaigh chugainn arís

Seo chugainn na Lochlannaigh arís. Tabharfaidh foireann na Danmhairge cuairt ar Áth Cliath anocht do chluiche ríthábhachtach eile agus aithne mhaith acu féin agus ag foireann na hÉireann ar a chéile.

Cothrom an ama seo dhá bhliain ó shin, tháinig an Danmhairg chuig Staid Aviva chun aghaidh a thabhairt ar Éirinn agus áit ag Corn an Domhain 2018 sa Rúis i ndán don bhuaiteoir. Cé go ndeachaigh Éire chun tosaigh sa chluiche, tubaiste cheart a bhí ann d’fhoireann Martin O’Neill mar rinne na Danmhargaigh scrios i gcluiche a chríochnaigh 5-1.

Droch-oíche cheart a bhí ann d’Éirinn ach léiríodh ó shin nach bhfuil mórán idir na foirne. Chas siad ar a chéile trí huaire eile le dhá bhliain anuas agus chríochnaigh gach cluiche acu sin ar comhscór.

Má faoi Éirinn áit a bhaint amach ag EURO 2020, caithfidh siad rud a dhéanamh nach bhfuil déanta acu sa tsraith sin cluichí agus na Danmhargaigh a bhualadh.

Ní thabharfadh torthaí na hÉireann le cúpla mí anuas údar dóchais do lucht tacaíochta na foirne. Níl aon cheann de na trí chluiche atá imeartha acu i gcomórtas cáilithe EURO 2020 le cúpla mí anuas buaite acu agus drochthaispeántas a thug foireann na hÉireann i gcoinne na Seoirsia agus i gcoinne na hEilvéise.

Bhuaigh foireann Mick McCarthy cluichí dúshláin i gcoinne na Bulgáire agus na Nua-Shéalainne sa tréimhse sin ach is beag tionchar a bheidh ag na cluichí sin ar cheann na hoíche anocht.

Dúirt McCarthy roimh an gcluiche i gcoinne na Nua-Shéalainne an tseachtain seo caite nach mbeadh aon duine a thosaigh sa gcluiche sin ag tosú i gcoinne na nDanmhargach.

D’éirigh go maith le Seán Maguire, a scóráil a chéad chúl d’Éirinn, ach seans go bhfanfaidh McCarthy dílis do Callum Robinson ar an gcliathán deas. Tháinig Robinson isteach mar ionadaí sa chluiche i gcoinne na Nua-Shéalainne agus scóráil sé féin a chéad chúl don fhoireann agus thug sé an-taispeántas.

D’fhéadfadh go mbeadh athrú i lár na páirce. Níor léirigh Conor Hourihane ná Alan Browne do  McCarthy go raibh siad iontach cumasach nuair a thug sé a ndeis don bheirt sin le cúpla cluiche anuas. Thosaigh Browne an cluiche Déardaoin seo caite ach bhí sé ciúin go maith agus seans gurb é Hourihane a bheidh ag imirt taobh le Glenn Whelan agus Jeff Hendrick i lár na páirce anocht.

An laige is mó a bhí ag Éirinn le tamall fada anuas ná a laghad seansanna ar chúil a chruthaigh siad. Beidh siad fós ag brath go mór ar chiceanna saora agus ar chiceanna cúinne anocht ach tá roghanna anois ag McCarthy más faoi rudaí a athrú.

Beidh muinín ag Seán Maguire faoin tráth seo agus thaispeáin Jack Byrne arís eile go mbíonn sé níos compordaí agus an liathróid ina sheilbh ná mar a bhíonn aon imreoir eile ar fhoireann na hÉireann.

Cé nach raibh na Danmhargaigh i mbarr a maitheasa le cúpla mí anuas, foireann láidir iad agus níl cluiche comórtais caillte acu ó Chorn an Domhain 2018. Níl an t-imreoir is fearr atá acu, Christian Eriksen, ag imirt rómhaith do Tottenham Hotspur i láthair na huaire ach tá a fhios ag Éirinn go maith cé chomh cumasach atá sé.

Méadaíonn an aithne an tarcaisne agus beidh díocas ar fhoireann na hÉireann agus iad ag iarraidh dream seo na Danmhairge a bhualadh den chéad uair le fada.