Tá an scríbhneoir Manchán Magan, an tionchaire ar líne Éadaoin Fitzmaurice agus an láithreoir teilifíse Maura Derrane ainmnithe mar ambasadóirí do Sheachtain na Gaeilge 2023.
Beidh an fhéile ar siúl i mbliana ón 1 Márta go dtí an 17 Márta. Tá sé i gceist imeachtaí a reáchtáil ar fud an domhain agus iad á n-eagrú ag grúpaí pobail, scoileanna, grúpaí cultúrtha agus spóirt in Éirinn agus thar sáile.
Rinneadh na hambasadóirí a fhógairt ag seoladh na féile inniu, ócáid a reáchtáladh i mBaile Átha Cliath.
Fógraíodh níos luaithe an mhí seo go raibh ciste tacaíochta ar luach €200,000 curtha ar fáil ag Roinn na Gaeltachta le clár imeachtaí a chur ar siúl ar fud na hÉireann leis an nGaeilge a cheiliúradh mar chuid den fhéile.
Tá Seachtain na Gaeilge á reáchtáil ag Conradh na Gaeilge ó 1902 agus tacaíocht faighte arís i mbliana ó Fhoras na Gaeilge agus Energia.
Fág freagra ar 'Triúr ambasadóirí Sheachtain na Gaeilge fógartha'