Thuill comhairleoir de chuid an DUP a bhásaigh den choróinvíreas moladh tráth as Gaeilge a labhairt

In 2018, agus é ina mhéara ar Aontroim agus Baile na Mainistreach, labhair Paul Hamill Gaeilge agus fáilte á cur aige roimh dhaoine chuig ócáid le linn Sheachtain na Gaeilge

Thuill comhairleoir de chuid an DUP a bhásaigh den choróinvíreas moladh tráth as Gaeilge a labhairt

Thuill iarmhéara ar Aontroim agus Baile na Mainistreach a fuair bás an tseachtain seo ardmholadh cúpla bliain ó shin as an nGaeilge a labhairt.

Bhásaigh Paul Hamill, iarchomhairleoir de chuid an DUP, i ndiaidh tréimhse fhada a chaitheamh san ospidéal.

An Covid-19 a thug bás Hamill a bhí ar aerálaí le seachtain.

In 2018, agus é ina mhéara ar Aontroim agus Baile na Mainistreach, labhair Paul Hamill Gaeilge agus fáilte á cur aige roimh dhaoine chuig ócáid le linn Sheachtain na Gaeilge.

“Dia daoibh agus fáilte mhór chugaibh go Mossley Mill chun an ceiliúradh speisialta seo, Seachtain na Gaeilge,” a dúirt sé agus thuill a chuid cainte bualadh bos mór.

Moladh Hamill ag an am as an nGaeilge a labhairt in ainneoin doicheall a pháirtí roimh an teanga.

Dúirt ceannaire an DUP Jeffrey Donaldson an tseachtain seo go mbraithfeadh daoine go mór uathu Hamill. Dúirt sé gur ionadaí poiblí “díograiseach dúthrachtach” a bhí ann a raibh “aithne agus meas” ag daoine ó gach cuid den phobal air.

Maireann a bhean Ruth agus a n-iníonacha Grace agus Sarah.

Léigh tuilleadh sa rannóg seo 'Nuacht'

Fág freagra ar 'Thuill comhairleoir de chuid an DUP a bhásaigh den choróinvíreas moladh tráth as Gaeilge a labhairt'

I mBéal an Phobail