Tarraingt na craoibhe peile déanta, cuma dhúshlánach ar chúrsaí do chontaetha Gaeltachtan Sam Mhig Uidhir

Tá an tarraingt déanta do bhabhta na ngrúpaí do Chorn Sam Mhig Uidhir agus Corn Tailteann agus múnla nua á úsáid ag CLG don chraobhchomórtas i mbliana.

D’fhéadfadh gur i nGrúpa 1 a bheidh seaimpíní na hÉireann Ciarraí má fhaigheann siad an ceann is fearr ar chontae an Chláir i gcluiche ceannais na Mumhan Dé Domhnaigh seo chugainn.

Sa chás sin, d’fhéadfadh gur in aghaidh Mhaigh Eo i gCill Airne a bheadh Ciarraí ina gcéad chluiche i mbabhta na ngrúpaí. Corcaigh agus an fhoireann a chaillfidh Cluiche Ceannais Chúige Laighean, Áth Cliath nó Lú, na foirne eile a bheidh i nGrúpa 1.

Má fhaigheann an Ghaillimh an ceann is fearr ar Shligeach i gcluiche ceannais Chúige Chonnacht Dé Domhnaigh, beidh siad i nGrúpa 2 le dhá cheann de na foirne is fearr sa tír.

In éineacht leo sa ghrúpa sin, bheadh Tír Eoghain agus an fhoireann a chaillfidh cluiche ceannais Chúige Uladh, Ard Mhacha nó Doire. An Iarmhí, buaiteoirí Chorn Tailteann na bliana seo caite, an fhoireann eile i nGrúpa 2.

Beidh Dún na nGall i nGrúpa 4 le seaimpíní Chúige Uladh, Ard Mhacha nó Doire, Muineachán agus an dream a chaillfidh cluiche ceannais na Mumhan, Ciarraí nó An Clár.

Beidh curaidh Chúige Laighean, Áth Cliath nó Lú i nGrúpa 3, mar a mbeidh Ros Comáin, Cill Dara agus an fhoireann a chaillfidh cluiche ceannais Chúige Chonnacht, Gaillimh nó Sligeach.

Imreoidh gach foireann in aghaidh na bhfoirne eile atá sa ghrúpa agus beidh cluiche amháin ag baile, cluiche as baile agus cluiche i bpáirc neodrach ag na foirne go léir. Imreoidh na seaimpíní cúige a gcéad chluiche ag baile in aghaidh an fhoireann atá réimnithe sa tríú háit in ord feabhais sa ghrúpa.

Imreofar an chéad bhabhta cluichí ar an 20-21 Bealtaine.

Rachaidh na foirne a chríochnóidh ar bharr a ngrúpaí díreach ar aghaidh go dtí babhtaí ceathrú ceannais chraobh na hÉireann. Imreoidh na foirne a chríochnóidh sa dara háit agus sa tríú háit sna grúpaí i réamhchluiche ceathrú ceannais.

Rinneadh an tarraingt inniu chomh maith do Chorn Tailteann. Beidh dhá chontae Gaeltachta, An Mhí agus Port Láirge, á fhéachaint le chéile i nGrúpa 2. An Dún agus Tiobraid Árann na foirne eile sa ghrúpa sin.

Tá dhá cheann eile de chontaetha móra traidisiúnta na peile i nGrúpa 1, An Cabhán, a chaill i gcluiche ceannais Chorn Tailteann anuraidh, agus Uíbh Fhailí a chaill i ndiaidh am breise in aghaidh Lú i gcluiche leathcheannais Chúige Laighean an deireadh seachtaine seo caite. Laois agus Londain na foirne eile i nGrúpa 1.

I nGrúpa 3, beidh Luimneach san iomaíocht le trí cinn d’fhoirne as Cúige Laighean, Cill Mhantáin, An Longfort agus Ceatharlach.

Fear Manach, Aontroim, Loch Garman agus Liatroim a tarraingíodh i nGrúpa 4.

Cáileoidh na foirne a chríochnóidh sa chéad áit sna grúpaí díreach ar aghaidh go dtí babhtaí ceathrú ceannais Chorn Tailteann. Imreoidh na foirne a chríochnóidh sa dara háit agus sa tríú háit réamhchluiche ceathrú ceannais, seachas ceann amháin de na foirne a chríochnóidh sa tríú háit.

Díbreofar an fhoireann is measa de na ceithre fhoireann a chríochnóidh sa tríú háit mar go bhfuil áit curtha ar leataobh sna réamhchluichí ceathrú ceannais do Nua-Eabhrac.

Corn Sam Mhig Uidhir

Grúpa 1

Grúpa 2

Grúpa 3

Grúpa 4

Corn Tailteann

Grúpa 1

Grúpa 2

Grúpa 3

Grúpa 4