Tháinig méadú beag i mbliana ar líon na ndaoine a rinne an scrúdú Gaeilge don Teastas Sóisearach agus ar líon na ndaltaí a bhain na marcanna is airde amach ag an ardleibhéal.
54,382 dalta a rinne scrúdú Gaeilge don Teastas Sóisearach i mbliana, i gcomparáid le 61,941 dalta i gcás na Matamaitice agus 61,898 i gcás an Bhéarla.
Fágann sin go bhfuil difríocht shuntasach i gcónaí idir líon na ndaoine a thug faoin scrúdú Gaeilge ach a rinne scrúdú Béarla nó Matamaitice in 2018.
Tá conspóid mhór le fada faoi líon na ndaltaí a fhaigheann díolúine ón nGaeilge, cé nach gá go raibh díolúine acu siúd ar fad nach ndearna scrúdú Gaeilge.
31,472 dalta a rinne an Ghaeilge ag an ardleibhéal i mbliana, ardú beag, 1.2%, ar an 31,092 a rinne amhlaidh in 2017. Tháinig ardú 1.5% ar líon na ndaltaí a rinne an Teastas Sóisearach féin in 2018. 62,562 dalta a rinne scrúdú an Teastais Shóisearaigh i mbliana, 30,744 cailín agus 31,818 buachaill.
Tá ardú 5.7% tagtha ar líon na ndaoine a dhéanann an scrúdú Gaeilge ardleibhéil ó 2016.
Fuair 11.4% de na daltaí a rinne Gaeilge ag an ardleibhéal in 2018 grád A, ardú beag ón 11% ar éirigh leo an grád sin a bhaint amach anuraidh. 35.4% a fuair grád B i mbliana, méadú ar an 32.9% a rinne amhlaidh in 2017. Bhí titim bheag i gceist i gcéatadán na ndaoine a fuair grád C i mbliana, 37.3% le hais 37.9% in 2017.
Tháinig laghdú i mbliana ar chéatadán na ndaoine a fuair grád D, 14.3%, i gcomparáid le 2017 nuair a fuair 16.3% an grád sin. 1.4% a fuair grád E i mbliana, laghdú beag ar an 1.7% a fuair an grád sin anuraidh. 0.2% a fuair grád F i mbliana an céatadán céanna a fuair an grád sin in 2017 agus in 2016.
Gaeilge (Ardleibhéal) |
||||||||
|---|---|---|---|---|---|---|---|---|
| Bliain | Iomlán | A | B | C | D | E | F | NG |
| 2018 | 31,472 | 11.4 | 35.4 | 37.3 | 14.3 | 1.4 | 0.2 | 0.0 |
| 2017 | 31,092 | 11.0 | 32.9 | 37.9 | 16.3 | 1.7 | 0.2 | 0.0 |
| 2016 | 29,770 | 11.9 | 35.8 | 36.6 | 14.5 | 1.1 | 0.2 | 0.0 |
Gaeilge (Gnáthleibhéal) |
||||||||
| Bliain | Iomlán | A | B | C | D | E | F | NG |
| 2018 | 21,822 | 3.2 | 28.7 | 40.2 | 22.8 | 4.4 | 0.6 | 0.1 |
| 2017 | 21,738 | 3.1 | 23.7 | 39.3 | 26.6 | 6.1 | 1.1 | 0.1 |
| 2016 | 21,566 | 2.5 | 29.8 | 43.8 | 20.2 | 3.1 | 0.5 | 0.0 |
Gaeilge (Bonnleibhéal) |
||||||||
| Bliain | Iomlán | A | B | C | D | E | F | NG |
| 2018 | 1,088 | 9.7 | 32.4 | 34.7 | 18.4 | 3.1 | 1.3 | 0.3 |
| 2017 | 1,008 | 8.2 | 33.2 | 36.8 | 17.9 | 3.0 | 0.6 | 0.3 |
| 2016 | 1,224 | 8.4 | 32.2 | 38.1 | 19.0 | 2.0 | 0.2 | 0.0 |
Fág freagra ar 'Tá na torthaí don Teastas Sóisearach amuigh agus briseadh síos ar fáil don Ghaeilge'