Chuir an t-amhránaí mór le rá Mary Coughlan deireadh le hagallamh a bhí socraithe tráthnóna do chlár Ivan Yates, The Hard Shoulder, ar an stáisiún Newstalk. Mar agóid in aghaidh an méid a bhí le rá ag comhghleacaí Yates, George Hook, faoin éigniú an tseachtain seo caite a d’fhógair an t-amhránaí nach raibh sí chun an t-agallamh a dhéanamh.
Chuir Yates fáilte roimh Coughlan ar an gclár tráthnóna agus súil aige labhairt léi faoi cheolchoirm a bheidh ar siúl aici níos deireanaí an mhí seo i gContae Chorcaí.
Thug Coughlan le fios don chraoltóir , áfach, nach raibh sí toilteannach labhairt le Newstalk mar gheall ar an méid a bhí le rá ag George Hook ar a chlár The Right Hook, faoi chás mná óige a éigníodh.
Tharraing Hook go leor conspóide nuair a thug sé le fios go raibh sé d’fhreagracht ar mhná aire a thabhairt dóibh féin agus nár cheart don bhean óg a bhí i gceist iontas a bheith uirthi gur éigníodh í toisc go ndeachaigh sí chuig seomra óstáin le strainséir.
“An amhlaidh nach bhfuil aon chuid den mhilleán le leagan ar an duine a chuireann í féin sa bhearna bhaoil?” a d’fhiafraigh Hook dá chuid éisteoirí Dé hAoine seo caite.
Ghabh Hook leithscéal as an ráiteas ó shin.
Dúirt Coughlan nach raibh sí sásta leanacht ar aghaidh leis an agallamh ar chlár an lae inniu i bhfianaise an ráitis sin agus mar chomhartha omóis do gach “bean, fear, buachaill, cailín agus duine” a éigníodh riamh.
Dúirt Yates leis an amhránaí gur ghabh Hook leithscéal iomlán as an méid a dúirt sé, ach níor athraigh Coughlan a hintinn faoin agallamh.
Cuireadh deireadh leis an agallamh agus lean Yates ar aghaidh ag léamh teachtaireachtaí óna éisteoirí amach faoi ábhar eile a pléadh ar an gclár roimhe sin.
Fág freagra ar 'Stop curtha ag Mary Coughlan le hagallamh ar Newstalk i bhfianaise ráiteas George Hook faoin éigniú'