Seans gur ar an mBóthar Beag a bheas an chraic an Satharn seo

Ba dheacair torthaí níos fearr a shamhlú ná mar a bhí ag na cúigí sna cluichí Eorpacha an deireadh seachtaine seo caite. Ceithre chluiche, ceithre bhua agus trí cinn acu siúd á n-imirt as baile, rud nach éasca am ar bith ach atá an-deacair go deo sa gcomórtas seo.

Anois beidh na cluichí ceannann céanna le n-imirt arís an deireadh seachtaine seo. Is iad na hUltaigh an chéad fhoireann a chuirfidh chun páirce tráthnóna, iad ag cur fáilte roimh Harlequins Londan. D’éirigh le fir Bhéal Feirste an lámh in uachtar (17-5) a fháil ar na ‘Quins”’sa Stoop an Domhnach seo caite, rud a fhágann nach bhfuil mórán ag tabhairt seans ar bith do na cuairteoirí agus iad imirt sa Kingspan. Tagaim féin leis an tuairim sin,  ach táim den tuairim freisin nach leor bua as féin do na hUltaigh, sin más leo áit sna cluichí ceathrú ceannais a chinntiú.  Caithfidh siad dul ar thóir ceithre úd agus an pointe bónais sin nach éasca teacht air sa gcomórtas seo.

Ar an Satharn a bheas na Laighnigh ag tabhairt faoi na Exeter Chiefs in athimirt den sárchluiche a chonaic muid idir an dá fhoireann seo seachtain ó shin.  Níl aon dabht ann ach gur léirigh fir Átha Cliath an chúis go bhfuil siad i measc rogha na coitiantachta don chomórtas agus iad ag oscailt bearna deich bpointe (18 -8) ar fhoireann bharr an Premiership agus iadsan ag imirt sa mbaile. Níl cúis ar bith nach ndéanfadh na Laighnigh an rud céanna agus buntáiste an bhaile acusan. Sea,  bua eile roimh Nollaig do na Laighnigh.

Dé Domhnaigh a bheas na Muimhnigh ag imirt arís i gcoinne na Leicester Tigers thall ar an Welford Road. Seans gurb é an cluiche seo an dúshláin is mó atá roimh aon chúige i mBabhta 4 de Chorn na gCuradh.  Is cinnte go mbeidh siad ag iarraidh cur leis an mbua iontach 33-10 a bhí acu an Satharn seo caite. Má éiríonn leo sin a dhéanamh, rud nach mbeidh ró-éasca agus na Sasanaigh ar thóir díoltais, beidh greim an fhir bháite acu ar an gcéad áit i nGrúpa 4 agus seans iontach acu dá réir ar áit sna cluichí ceathrú ceannais, fiú agus dhá chluiche fós le n-imirt sna réamhbhabhtaí.

Seans gur ar an mBóthar Beag a bheas an chraic an Satharn seo nuair a bheas na Connachtaigh sa gcoimhlint le Brive na Fraince. Rinne na Connachtaigh aiséirí iontach sa gcluiche seo seachtain ó shin nuair a bhí bua iontach 38 – 31 ar na Francaigh. Tá mise ag tuar nach bhfuil gá ar bith le haon aiséirí sa gcluiche seo, níl bheidh glacadh ag lucht leanta na gConnachtach le haon toradh seachas bua cuimsitheach, rud a tharlóidh.