Seanfhondúirí na Gaillimhe in aghaidh ógánaigh Chorcaí i gcluiche ceannais na hÉireann

D’fhág cluichí leathcheannais na míosa seo caite gur cheart go mbeadh Corcaigh agus Gaillimh breá ullamh do chluiche crua tráthnóna. Tháinig an dá fhoireann slán ó chluichí crua agus beidh an dá dhream ag súil gur chun a leasa a rachaidh sin agus iad ag iarraidh Craobh na hÉireann a thabhairt leo inniu.

Tá Corcaigh ar ais i gcluiche ceannais na hÉireann den chéad uair ó bhí 2018 ann tar éis dóibh an ceann is fearr a fháil ar sheaimpíní na hÉireann, Cill Chainnigh. Cúilín ó Linda Collins ag fíordheireadh an chluiche a rinne na foirne a scaradh óna chéile.

Farasbarr ceithre phointe a bhí ag Gaillimh ar Thiobraid Árann sa chluiche leathcheannais eile ach bhí an t-ádh le Gaillimh agus le hOrlaith McGrath cúl a scóráil i dtreo dheireadh na himeartha, scór a chinntigh go gcáileoidís don chluiche ceannais. Tugadh dúshlán ceart do na Gaillmhigh roimhe sin agus is maith a thuigeann Cathal Murray go mbeidh taispeántas níos fearr ag teastáil má tá a fhoireann chun an chraobh a chailleadar anuraidh a thabhairt leo arís.

Cúrsaí smachta a bhí ag cur as don dá fhoireann i rith na seachtaine. Bhí dea-scéala ann do Ghaillimh agus cead tugtha do Dervla Higgins imirt. Cuireadh Higgins den pháirc in aghaidh Thiobraid Árann sa chluiche leathcheannais ach níor cuireadh ar fionraí í agus é cruthaithe nach raibh aon bhaint aici leis an eachtra a tharla i dtreo dheireadh an chluiche. Emma Helebert na Gaillimhe a tharraing buille ar dhuine d’imreoirí Thiobraid Árann san eachtra chéanna ach beidh cead aici imirt sa chluiche ceannais mar sin féin mar de réir rialacha na camógaíochta ní féidir imreoir a chur ar fionraí nuair nach bhfuil an eachtra luaite i dtuairisc an réiteora.

Bhí dea-scéala ann do Chorcaigh aréir freisin agus éirithe le hachomharc Orla Cronin i gcoinne an chárta dheirg a fuair sí sa chluiche in aghaidh Chill Chainnigh.

Tá an-chuid taithí ag foireann na Gaillimhe agus is í Higgins an t-aon duine atá ainmnithe ar fhoireann an lae inniu nár imir i gcluiche ceannais 2020 ná i gceann 2019. Tá Carrie Dolan agus Heather Cooney, a bhí ar iarraidh ó thús na craoibhe de bharr gortuithe, ainmnithe i measc na n-ionadaithe ag Gaillimh.

Tá foireann níos óige ag Corcaigh agus deis tugtha ag Paudie Murray d’imreoirí nua le cúpla bliain anuas. Bhí air sin a dhéanamh agus dornán den fhoireann a bhuaigh Craobh na hÉireann in 2018 – leithéidí Aoife Murray, Gemma O’Connor, Orla Cotter, Julia White agus Briege Corkery – éirithe as an imirt.

Tá an deis tapaithe le fonn ag Amy Lee, Laura Hayes, Saoirse McCarthy, Fiona Keating agus Ciara O’Sullivan áit a bhaint amach ar an bhfoireann. Go deimhin, léiriú é ar chomh maith is a d’éirigh leo go dtí seo go gceaptar nach mbeidh mórán idir na foirne i bPáirc an Chrócaigh inniu.

Beidh na Gaillimhigh ag súil go seasfaidh an taithí bhreise sin dóibh ach beidh taispeántas níos fearr ná mar a thugadar in aghaidh Thiobraid Árann ag teastáil más leo an beart a dhéanamh.