Seachtain fágtha go toghchán SAM agus níl siad ag fanacht sa mbaile i mbliana

Seachtain ó inniu tabharfaidh an chuid sin de phobal na Stát Aontaithe nach bhfuil vóta caite acu go dtí seo aghaidh ar na bothanna vótála.

Fearacht an chuid eile den domhan tá cuid mhaith den méid a dhéanfaidh siad ag brath chomh mór céanna ar chúinsí áitiúla is atá ar pholasaithe náisiúnta. I ndeireadh an lae níl le rá ach gur reifreann a bheidh anseo ar uachtaránacht Donald Trump.

An bhfuil pobal na Stát Aontaithe sásta a muinín a chur ann go ceann ceithre bliana eile? An gcreideann siad go bhfuil siad níos fearr as inniu ná a bhí siad in 2016? An gcreideann siad go bhfuil an córas athraithe aige mar a gheall sé?

Bhí pobal Mheiriceá bréan de Washington D.C. agus a gcóras polaitíochta ceithre bliana ó shin. Theastaigh athrú uathu. Gheall Donald Trump, an fear gnó agus teilifíse, athrú dóibh mar gur strainséir thar tír isteach a bhí ann. Ba dhlúthchuid de chóras Washington le blianta fada í Hillary Clinton agus níor thaitin sí leo. Dá bharr sin d’fhan siad sa mbaile. B’ionann sin agus vóta a thabhairt do Donald Trump in go leor áiteacha.

Níl siad ag fanacht sa mbaile i mbliana de réir chuile chosúlacht. Tá siad i scuainí le roinnt seachtainí cheana féin. Tá vóta luath caite ag beagnach trí scór milliún duine. Tá go leor ag caitheamh a vóta tríd an bpost mar gheall ar an víreas corónach. An gcuirfidh sin tuilleadh leis an tinreamh? Shamhlófá go gcuirfeadh ach sí  an cheist atá le cur ná cé hiad? Na Daonlathaigh a d’fhan sa mbaile an t-am deiridh? Na daoine gorma a chaith píosa mór den bhliain ag agóidíocht faoin gcóras dlí agus cirt sna Stáit Aontaithe faoi dhúnmharú George Floyd agus Breonna Taylor? Na mná a gcuireann dearcadh drochmheasúil Donald Trump ina leith fearg orthu?

Pé dream is mó a thagann amach is i sciar an-bheag de na stáit a bheidh a vóta fíorchinniúnach. Beidh Trump, Mike Pence, Biden agus Kamala Harris ag taisteal go ceann seachtaine eile idir Wisconsin, Michigan, Pennsylvania agus Florida. Is sna Stáit seo a bhuafar nó a chaillfear an toghchán. Thug Trump Wisconsin agus Michigan leis in 2016 agus gan súil ar bith leis. Is minic le Florida agus Pennsylvania a bheith cinniúnach. Tá 10 vóta sa gcoláiste toghcháin ag Wisconsin, 16 ag Michigan, 29 ag Florida agus 20 ag Pennsylvania.

Bíonn sé deacair i gcónaí toghchán uachtaránachta a thabhairt leat i Meiriceá d’uireasa vótaí Florida ach tá sé indéanta. Corr nua sa scéal an tseachtain seo go bhfuil Biden chun cinn sna pobalbhreitheanna in Texas.  Dúnáras Poblachtach a bhfuil 38 vóta aige sa choláiste toghchánaíochta is ea Texas. Buille marfach do Trump é má chailleann sé é.

Pé fear a fhógraítear ina bhuaiteoir an tseachtain seo chugainn – má fhógraítear buaiteoir – samhlaím nach le gean iontach air ná le muinín mhór ann a bheidh  an pobal dá roghnú. Tá bonn tacaíochta ag Trump nach féidir a mhealladh in aon treo eile agus deir na pobalbhreitheanna go bhfuil sciar suntasach den phobal nach n-admhóidh go bhfuil siad lena vóta a thabhairt dó. Droch-iarrthóir é Biden a bhíonn doiléir agus cineál scaipthe go minic ina chuid cainte. Níl amhras ach gur fear deas é agus is beag a fheiceann aon dochar ann murab ionann agus a chéile comhraic.

Déanfaidh sí seachtain spéisiúil agus cuirfidh muid aithne mhaith ar roinnt áiteacha i Meiriceá! Is cinnte gur beag atá eatarthu agus inseoidh na laethanta seo romhainn cén fear is fearr a thiocfaidh i gcion ar an sciar beag den phobal vótála nach bhfuil a n-intinn déanta suas acu go fóill.