Craolfar anocht ar TG4 clár faisnéise faoi Tim Dowd, bleachtaire as Ciarraí a bhí lárnach i gceann de na fiosrúcháin dúnmharaithe ba cháiliúla riamh i stair Mheiriceá.
In Son of Kerry, Son of Sam insítear scéal Tim Dowd, as Ciarraí, an príomhbhleachtaire i bhfiosrúchán David Berkowitz, dúnmharfóir srathach a chuir alltacht agus scéin ar phobal Nua-Eabhrac 40 bliain ó shin.
Ag labhairt dó le Tuairisc.ie inniu, dúirt an t-iriseoir Seán Mac an tSíthigh, atá ina láithreoir ar an chlár, gur tháinig sé ar Tim Dowd den chéad uair in 2014 agus scéal a bháis á léamh aige in alt a foilsíodh sa New York Times.
“Luadh san alt gur Ciarraíoch ab ea é ach ní chualas aon trácht air roimis sin. Dé ghnáth, bíonn go leor cainte faoi mhuintir Chiarraí a chuaigh ar imirce agus ar éirigh go maith leo ach thuigeas nach raibh puinn cur amach ag daoine mar gheall ar ghaiscí Tim Dowd,” a dúirt sé.
Sa chlár, téann Mac an tSíthigh go Nua-Eabhrac le labhairt le comhghleacaithe Dowd a raibh baint acu leis an fhiosrúchán, le duine a d’ionsaigh Berkowitz agus le hiriseoirí a bhfuil saineolas acu ar an scéal.
Rugadh Tim Dowd gar do Chaisleán na Mainge i gCiarraí sa bhliain 1915. Ba é an páiste ab óige as cúigear. Bhí sé ocht mbliana d’aois nuair a chuaigh a mhuintir ar imirce. Go Bostún a chuaigh siad ar dtús agus as sin go Nua-Eabhrac.
Agus oideachas maith faighte aige, chuaigh Dowd isteach sna póilíní, rinne sé dul chun cinn maith agus rinneadh bleachtaire de.
Ba i 1976 a thosaigh sé ag obair ar chás David Berkowitz, tráth a mharaigh an dúnmharfóir, i gceantar an Bronx, an chéad duine den seisear.
Deir Mac an tSíthigh gur “ag díriú ar lánúin óga” agus “ar mhná le gruaig dhonn” a bhí Berkowitz agus gur minic a ionsaíodh na lánúineacha agus iad “ag cúirtéireacht i ngluaisteán a bheadh páirceáilte taobh na sráide istoíche”.
“Bhí an scéal chomh mór san i mbéal an phobail ag an am go raibh an chathair ar fad imithe le gealaí agus an tír ar fad ag caint mar gheall air,” a dúirt láithreoir an chláir.
Sa chlár, a léirigh agus a stiúir Neal Boyle, léirítear gur éirigh Berkowitz níos ceanndána de réir a chéile nó gur thosaigh sé ag scríobh litreacha chuig an bhleachtaire Tim Dowd agus chuig iriseoirí a bhí ag plé leis an chás.
Mharaigh Berkowitz seisear agus ghortaigh sé seachtar eile go dona in achar 13 mhí sular rug Tim Dowd agus a fhoireann air.
Dúirt Mac an tSíthigh gur “fear an-chríochnúil agus an-dílis dá chuid oibre” ab ea Dowd, ar nós leis “gach rud a chinntiú agus a sheiceáil arís agus arís”.
“Fear umhal agus íseal uasal ab ea é chomh maith nár thaitin leis go mbeadh na meáin ag díriú air.
“Ní raibh spéis aige sa stádas nua a bhí á bhronnadh air. B’iomaí tairiscint a tháinig chuige chun leabhar a scríobh agus dhiúltaigh sé ar fad iad.”
Dúirt Mac an tSíthigh gurb iontach an rud é go bhfuil deis anois “aitheantas a thabhairt don ngaisce a dhein Tim Dowd i gceann des na cásanna is cáiliúla riamh i stair Mheiriceá.”
Craolfar Son of Kerry, Son of Sam anocht ag 9.30p.m. ar TG4.
tommy
Ach an mbéarfaidh na Ciarraígh ar na dúnmharfóirí srathacha eile sin …na Dubs?