Roinn na Gaeltachta dúnta de dheasca fadhb luchóg

Tá ceannáras Roinn na Gaeltachta sna Forbacha dúnta mar gheall ar fhadhb luchóg.

Dheimhnigh urlabhraí ó Roinn na Gaeltachta do Tuairisc gur dúnadh oifigí na roinne nuair a fuarthas amach “faoi fhadhb bheag maidir le srianadh creimirí”.

“Tá Sláinte agus Sábháilteacht ár bhfoirne ríthábhachtach dúinn agus mar sin glacadh an cinneadh an foirgneamh a dhúnadh go dtí go mbeimid muiníneach go bhfuil an fhadhb réitithe go hiomlán,” a dúirt an t-urlabhraí.

Tuigtear do Tuairisc gur dúnadh an oifig agus gur cuireadh abhaile an fhoireann ar dtús ar feadh trí seachtaine ach go bhfuarthas amach nuair a d’fhill siad nach raibh an fhadhb réitithe ar fad agus gur cuireadh abhaile arís iad.

Tá obair ar bun faoi láthair ar an gcistin san oifig.

“Tar éis iniúchadh a dhéanamh, fuarthas amach go bhfuil gá le huasghrádú a dhéanamh ar an gcistin.

“Táimid i mbun oibre le hOifig na nOibreacha Poiblí, úinéirí an fhoirgnimh, chun oibreacha feabhais a dhéanamh mar thosaíocht. Tá na hoibreacha seo le tosú sna laethanta amach romhainn,” a dúirt an t-urlabhraí le Tuairisc.

Dúirt an t-urlabhraí nach raibh “aon bhriseadh” sa tseirbhís a chuireann an Roinn ar fáil agus go raibh “socruithe” cianoibre déanta leis an bhfoireann go léir.

“Níl aon bhriseadh ar na seirbhísí a chuirimid ar fáil mar Roinn. Fillfidh an fhoireann ar na socruithe oibre chumaiscthe a bhí ann roimhe seo a luaithe a bheidh na hoibreacha críochnaithe agus a bheidh gach imní sláinte agus sábháilteachta réitithe,” arsa urlabhraí Roinn na Gaeltachta.