PRO 14: Oiread na fríde idir Treviso agus Cúige Chonnacht

Ba chóir go mbeadh bua éasca go maith an deireadh seachtaine seo ag Cúige Mumhan agus Cúige Uladh ach tá cluiche níos crua roimh na Connachtaigh agus d’fhéadfadh Dún Éideann croitheadh a bhaint as na curaidh, Cúige Laighean

PRO 14: Oiread na fríde idir Treviso agus Cúige Chonnacht

Pictiúr: INPHO/Laszlo Geczo

Caithfear dearmad a dhéanamh ar an ngreadadh agus an náiriú a fuair ár bhfoireann idirnáisiúnta i gcoinne na Breataine Bige i gCaerdydd an Satharn seo caite más féidir ar chor ar bith é. Níl am ag na clubanna a bheith ag caoineadh an lagiarracht a rinne a gcuid imreoirí sinsearacha agus iad sa ngeansaí glas mar go bhfuil Babhta 18 den Pro 14 sa mhullach orthu an deireadh seachtaine seo.

Is iad na Connachtaigh agus na Laighnigh a bheas ag cur chun páirce anocht i mBabhta 18 den Pro 14. Ar an mBóthar Beag a bheas fir na Gaillimhe ag imirt in aghaidh Treviso na hIodáile. Tá Treviso ag déanamh thar barr i gcomórtas na bliana seo. Is iad atá sa dara háit ar thábla Ghrúpa B, gaisce neamhchoitianta ag foireann as an Iodáil. Sa tríú háit i nGrúpa A atá na Connachtaigh agus gan ach ceithre chluiche fós le n-imirt acu sna réamhbhabhtaí. Beidh siad ar a míle dícheall ag iarraidh chuile leas a bhaint as buntáiste an bhaile. Seo é an chéad uair ag na foirne seo casadh ar a chéile i bPro 14 na bliana seo agus is deacair an toradh a thuar. Níl tada eatarthu ach oiread maidir le líon na n-úd atá aimsithe acu, 51 i gcás Threviso agus 50 i gcás na gConnachtach. 

Tá mise ag tacú le bua do na Connachtaigh ar an mbonn gur sa mbaile ar an mBóthar Beag a imreofar an cluiche seo.

Ar Dhún Éideann a bheas Cúige Laighean ag triall agus iad ar bharr Ghrúpa B agus iad cinnte cheana féin dá n-áit sna cluichí ceathrú ceannais. Mar sin féin ní bheidh siad sásta tada a thabhairt uathu go bog. Tá Dún Éideann cúig áit taobh thiar de Chúige Laighean ach tá seans fós acu an tríú háit sa ngrúpa a bhaint amach, rud a bheas mar spreagadh iontach acu agus iad ag iarraidh chuile leas a bhaint as imirt sa mbaile. Ná bíodh iontas ort má bhaineann siad croitheadh sa na curaidh.

Ar an Satharn a bheas Cúige Mumhan agus Cúige Uladh ag cur chun páirce agus iad sa mbaile i gcoinne an dá fhoireann atá ar íochtar an dá thábla. Ní bheidh stró ar bith ar Chúige Mumhan bua le pointe bónais a fháil ar Zebre. 

Seans gurb ionann an cás do Chúige Uladh a bheas ag cur fáilte go Béal Feirste roimh Kings na hAfraice Theas. Sea, bua éasca eile do na hUltaigh. 

Fág freagra ar 'PRO 14: Oiread na fríde idir Treviso agus Cúige Chonnacht'