Cúig chlár Gaeilge atá i sceideal an fhómhair ag RTÉ, ag áireamh trí shraith agus dhá chlár faisnéise aonair.
I measc na gcláracha Gaeilge nua i sceideal an fhómhair RTÉ a fógraíodh inniu, tá Cosáin Cheoil, comhléiriú idir RTÉ agus BBC Alba a dhéanann scagadh ar na ceangail idir ceol traidisiúnta na hÉireann agus na hAlban le leathchéad bliain anuas. Sé chlár a bheidh sa tsraith seo a chuirfear tús léi ar an 28 Meán Fómhair ar RTÉ One.
I measc na gceoltóirí a bheidh le cloisteáil sa chlár beidh Zoe Conway, Doimnic Mac Giolla Bhríde agus Andy Irvine.
Dúirt Grúpcheannasaí Gaeilge RTÉ, Rónán Mac Con Iomaire, gur sraith shuaithinseach é Cosáin Cheoil “ní hamháin ó thaobh sárchaighdeán an chláir agus an cheoil” ach ó thaobh an “suntas” atá á thabhairt dó ar sceideal RTÉ One. Craolfar Cosáin Cheoil ag 8.30pm sé Aoine i ndiaidh a chéile.
“Le blianta beaga anuas, tá muid ag bogadh cláracha amach as an spás traidisiúnta a bhíodh ag cláracha Gaeilge ar RTÉ, agus tá an clár áirithe seo dhá chur os comhair an lucht féachana ag buaic-am féachana oíche Dé hAoine,” arsa Mac Con Iomaire.
Tá sraith nua den tsraith spóirt An Geansaí ag filleadh ar RTÉ One an fómhar seo ach spóirt eile seachas cluichí CLG a bheidh faoi chaibidil ann i mbliana. I gceann amháin de na cláir seo leanfar beirt dornálaithe óga, Antaine ‘Toto’ Ó Gríofa as Gaeltacht Chonamara agus Christina Desmond ó Chill na Martra, agus iad ag iarraidh áit a bhaint amach ar fhoireann Oilimpeach na hÉireann. I gclár eile sa tsraith tabharfar cuairt ar chlub rugbaí Ghaeltacht Chorca Dhuibhne.
Pléifidh an tsraith Ar Son na Poblachta le scéalta ó Chogadh na Saoirse “nach bhfuil go mór i mbéal an phobail ach a léiríonn cé chomh casta agus conspóideach atá stair na hÉireann go dtí an lá atá inniu féin”.
Clár leathuaire é Phil Lynott: Scéalta ón Old Town, ina dtugtar turas timpeall ar chathair Bhaile Átha Cliath bunaithe ar an bhfíseán cáiliúil a ghabh le hamhrán iomráiteach Lynott.
Breathnóir
Is maith ann do na cláir seo; bíonn go leor acu fíorspéisiúil agus déantar go slachtmhar iad.
ACH… tá gearán beag agam maidir le RTÉ, a bhaineann leis an Seinnteoir. Tá an seinnteoir céanna fós aonteangach agus ní i gcónaí a oibríonn sé i gceart. Freisin, tá Gaeilge fós curtha sa chatagóir céanna ar an Seinnteoir le ´Religious Programming´, rud nach dtuigim ar chor ar bith; níl ar fáil mar chláir sa chatagóir sin ach eagráin na seachtaine roimhe de ´Nuacht´ & eipeasóid amháin de chlár a rinneadh cúpla bliain ó shin… Seans ar bith go dtiocfadh libh feabhas a chur ar chúrsaí, RTÉ?