O’Neill ag súil le feabhas céim ar chéim ach géarghá le bua anocht

I ndiaidh an chluiche 0-0 in aghaidh na Danmhairge Dé Sathairn, chaithfeá a rá go bhfuil dul chun cinn déanta ag Éirinn. Bhí naoi gcúl géillte acu sa dá chluiche comórtais a d’imir siad roimhe sin agus ar a laghad níor tugadh stánáil eile dóibh i Staid Aviva.

Faraor, tá neart oibre fós le déanamh ag Martin O’Neill agus ag a chuid imreoirí. Cé gur bhain O’Neill úsáid as córas imeartha nua, 3-5-1-1, bhí an chuid eile dá chur chuige feicthe go minic cheana againn. Is amhlaidh a bhí Éire ag titim siar i mbun na cosanta i gcónaí, rud a d’fhág tréimhsí fada iad gan seilbh ar bith á fáil acu ar an liathróid.

D’admhaigh O’Neill i ndiaidh an chluiche go raibh sé ag iarraidh roinnt rudaí faoin stíl sin a athrú ach go dtógfaidh sé am. Shamhlófá, mar sin, nach dtiocfaidh mórán d’athrú ar an scéal agus Éire ag dul chun páirce arís in aghaidh na Breataine Bige anocht.

Ar a laghad ní bheidh teacht ag an mBreatain Bheag ar thriúr de na himreoirí is fearr a bhí acu nuair a thug siad greadadh d’Éirinn an mhí seo caite. Tá laoch na foirne, Gareth Bale, gortaithe, agus is amhlaidh an scéal ag Ethan Ampadu, a bhí ar fheabhas i lár na páirce sa chluiche sin a bhuaigh siad 4-1. Fógraíodh inné nach mbeidh teacht ag Ryan Giggs ach oiread ar Aaron Ramsey Arsenal.

Tá rudaí imithe in olcas do Giggs agus don Bhreatain Bheag ó bhuaigh siad an cluiche sin i gcoinne na hÉireann. Chailleadar 2-0 i gcoinne na Danmhairge mí Mheán Fómhair agus bhuaigh An Spáinn 4-1 orthu in Caerdydd oíche Déardaoin.

Fágann sin go bhfuil deis mhaith ag Éirinn i gcluiche na hoíche anocht ach caithfidh siad a bheith níos fearr ná a bhí siad in aghaidh na Danmhairge, go háirithe agus iad ag dul ar an ionsaí.

Seans gurb é fear mór Dhoire, Shane Duffy, an t-imreoir is mó a chuirfeadh imní ar chosantóirí an fhreasúra agus fad a bhíonn an cás amhlaidh, beidh Éire i gcónaí i dtaobh le ciceanna saora nó ciceanna cúinne chun deiseanna a chruthú.

Tá sé ríthábhachtach go mbuafadh Éire an cluiche seo mar, má theipeann orthu, beidh sé deacair orthu ísliú céime go Roinn 3 de Chomórtas Sraithe na Náisiún UEFA a sheachaint. Dá dtarlódh sé sin, beidh siad sa tríú pota don tarraingt do chluichí cáilithe EURO 2020 agus é níos deacra fós orthu áit a bhaint amach ag mórchomórtas na hEorpa.

Ní fhacamar aon taispeántas maith ó fhoireann na hÉireann ó mhí Deireadh Fómhair na bliana seo caite nuair a bhuail siad an Bhreatain Bheag 1-0 in Caerdydd.

Ba dheacair breathnú ar imirt na hÉireann an oíche sin ach imirt éifeachtach ab ea í. Tá gá le toradh den chineál céanna anocht.