O’Mahony agus Henshaw ainmnithe don chluiche in aghaidh na Breataine Bige

Tá dhá athrú déanta ag Andy Farrell ar fhoireann rugbaí na hÉireann don chluiche i gcoinne na Breataine Bige i gCraobh na Sé Náisiún Dé Sathairn.

Gortaíodh Caelan Doris agus Garry Ringrose sa gcluiche inar bhuaigh Éire ar Albain Dé Sathairn seo caite agus, mar a tharla sa chluiche sin, is iad Peter O’Mahony agus Robbie Henshaw atá le teacht ina n-ionad.

Bhain gortú cloiginn do Doris luath sa chluiche in aghaidh na hAlban agus é ag imirt den chéad uair d’Éirinn. Bhí ar Ringrose an pháirc a fhágáil ag leath ama agus a ordóg gortaithe. Meastar nach mbeidh sé ar fáil arís go mbeidh an cluiche in aghaidh Shasana thart ag deireadh na míosa.

Níl aon athrú eile déanta ag Farrell ón bhfoireann a bhuaigh ar Albain Dé Sathairn, agus an scór 19-12.

Gortaíodh Tadhg Furlong agus Dave Kilcoyne an deireadh seachtaine seo caite chomh maith ach tá an bheirt tagtha chucu féin don chluiche in aghaidh na Breataine Bige i mBaile Átha Cliath. Is sa líne thosaigh a bheidh Furlong arís agus Kilcoyne ainmnithe i measc na n-ionadaithe.

Lá mór a bheidh ann do dhuine d’ionadaithe na foirne agus deis tugtha do Max Deegan a chéad chluiche a imirt d’Éirinn. Is sa líne chúil a imríonn fear Chúige Laighean.

Tá Keith Earls roghnaithe i measc na n-ionadaithe arís. Bhí seisean gortaithe don chluiche chéad bhabhta in aghaidh na hAlban.