OÍCHE CHULTÚIR: Breis agus 120 imeacht Gaeilge á reáchtáil ar fud na tíre amárach

Beidh imeachtaí Gaeilge á reáchtáil sna ceantair Ghaeltachta, sna cathracha agus in áiteanna ar fud na tíre amárach don Oíche Chultúir.

Breis agus 120 imeacht Gaeilge atá cláraithe leis an Oíche Chultúir i mbliana agus sa Ghaeltacht a bheidh níos mó ná 30 de na himeachtaí sin á reáchtáil.

Is í seo an cúigiú bliain déag ag an Oíche Chultúir a bheith á reáchtáil ar fud na tíre agus tá clár speisialta á chur ar fáil ag Ealaín na Gaeltachta agus Oireachtas na Gaeilge do phobal na Gaeilge agus na Gaeltachta.

Beidh Róisín Seoighe, an chéad Ambasadóir Gaeltachta don Oíche Chultúir i mbun ceoil Tigh Ghiblin ar an Spidéal i gConamara amárach agus Tadhg Mac Dhonnagáin agus ceoltóirí eile as an áit ina teannta.   

Dúirt Róisín Seoighe gur “mór an onóir” di a bheith ina hambasadóir Gaeltachta don Oíche Chultúir i mbliana, an chéad bhliain ar ceapadh Ambasadóir Gaeltachta don ócáid.

“Mar ealaíontóir a rugadh sa nGaeltacht, is rud í an Ghaeilge a bhí agus atá i gcónaí mar chuid lárnach de mo shaol agus mo chuid ceoil. Tá grá mór agam don chultúir, don cheol agus an traidisiún Gaelach agus is iontach an rud é gur féidir liom na rudaí seo atá chomh tábhachtach domsa a cheiliúradh mar ambasadóir don Oíche Cultúir 2019,” a dúirt Róisín Seoighe.

I measc na n-imeachtaí spéisiúla Gaeilge a bheas ar siúl sna cathracha, beidh curacha agus seanbháid thraidisiúnta eile de chuid Bhádóirí an Cladaigh le feiceáil i gCuan na Gaillimhe ó thráthnóna agus taispeánfar An Saothraí, leagan Gaeilge den scannán beochana The Breadwinner faoi chailín óg atá ag fás aníos faoin Taliban san Afganastáin, sa Taibhdhearc i nGaillimh ag a 7pm.

Cuirfear fáilte roimh chách teacht agus cluas a thabhairt d’imreoirí aitheanta de chuid Chumann Lúthchleas Gael agus iad faoi agallamh i bPáirc an Chrócaigh óna 7pm – 9pm.

I gcathair Dhoire, beidh amhráin a bhaineann le Doire á gceol ag amhránaithe áitiúla in Amharclann an Guildhall ag ‘Macallaí ón Dair’ ó 6pm- 8pm.

Níl ach cúig chontae nach bhfuil aon imeacht Gaeilge fógartha iontu don oíche amárach – Cill Chainnigh, Longfort, Uíbh Fhailí, An Iarmhí agus An Clár.

Tá gach eolas faoi na imeachtaí ar fad a bheas ar siúl oíche amárach ar fáil ar shuíomh Oíche Chultúir.

Imeachtaí Gaeltachta na hOíche Chultúir

Dún na nGall

Úsáid na Súl

Taispeántas leis an ealaíontóir áitiúil Karol Mac Gairbheith ina mbeidh rogha den saothar is déanaí leis le feiceáil.

Leabharlann Phobal Ghaoth Dobhair, Áislann Ghaoth Dobhair ag 5in

Scéalta ón staid reatha

Scéalta lucht iarrtha tearmainn. Á gcur i láthair ag Stiúideo Thigh na Cúirte.

Gteic, Áislann Ghaoth Dobhair ag 7in

Ar an Ché le Clapsholas – Plein Eir

Tráthnóna péinteála amuigh faoin aer (ar an ché agus an trá) leis an ngrúpa péinteála Plein Eir.

Cé Mhachaire Rabhartaigh ag 7in

Is orainn atá an óige

Oíche oscailte an chlub óige, mar a mbeidh ceol, damhsa, agus scéalaíocht ar siúl.

Áislann Rann na Feirste ag 7-9.30in

Ceartlár an Cheoil

Tiocfaidh ceoltóirí óga as Conamara agus ceoltóirí ón Chrann Óg le chéile don Oíche Chultúir. Beidh seisiún ceoil ina dhiaidh óna 10pm le Harry Bradley, Paul O’Shaughnessy agus Séamus O’Kane.

Teach Hiúdaí Beag, Gaoth Dobhair ag 8pin

Cnoc & Cladach

Oíche airneáin ag a mbeidh amhránaithe, ceoltóirí, scéalaithe agus damhsóirí de bhunadh Thoraí agus Chloich Cheann Fhaola ag ceiliúradh an cheangail atá idir Toraigh agus an Fál Carrach

An tSeanbheairic, An Fál Carrach ag 8in

Glórthaí Uladh

Oíche amhránaíochta sa Mhuileann le fonnadóirí Chúige Uladh.

Muileann Chorr Chreagáin, Dún Fionnachaidh ag 8in

Gaillimh

Ceardlann cheoil ar an Spidéal

Ceol agus scéalta do pháistí i nGaeilge le Julian de Brún

Leabharlann an Spidéil ag 5in

Seisiún ceoil ar an Spidéal

Beidh Ambasadóir Oíche Chultúir na Gaeltachta Róisín Seoighe agus a cairde i mbun ceoil, amhránaíochta agus rince agus an Oíche Chultúir á ceiliúradh 

Tigh Ghiblín, An Spidéal, Co na Gaillimhe ag 8in

Cór Chois Fharraige

Ceolchoirm le hamhránaithe Chois Fharraige

Seanscoil Sailearna, Indreabhán ag 4in

Fís-ealaíontóirí Chois Fharraige

Ceardlann chomhoibritheach bunaithe ar an gcladach leis na healaíontóirí Andrea Rossi agus Lelia Ní Chathmhaoil

An Cheardlann, An Spidéal ag 7in

Dráma nua le Fíbín

Léireofar Cóisir Tí, dráma nua le Philip Doherty, stiúrthóir ealaíne an chomhlachta, taobh amuigh dá gceannáras ar an Tulaigh i gCois Fharraige.

Ceannáras Fíbín ar an Tulaigh i gConamara ag 7:30in

Seisiún amhránaíochta

Oíche amhránaíochta ag Club Amhránaíochta na Ceathrún Rua.

An Chistin, An Cheathrú Rua  9.30-11.30in

Oíche cheoil agus scannáin á eagrú ag Áras Éanna

Taispeánfar an scannán Gaeltachta a rinneadh in Árainn, Man of Aran agus ceol beo nua-chumtha curtha leis ag na ceoltóirí Simon O’Reilly agus Alex Browne

Inis Oírr, Cuan na Gaillimhe ag 7.30in

Maigh Eo

Tút do Thrumpa Féin!

Beidh ceoltóirí, scríbhneoirí, ealaíontóirí, damhsóirí agus aisteoirí in Áras Inis Gluaire agus iad ullamh chun deis a thabhairt don phobal uirlisí a thriail, céimeanna a fhoghlaim agus cur lena scileanna drámaíochta, scríbhneoireachta agus ealaíne.

Áras Inis Gluaire, Béal an Mhuirthead ag 7in

Tuar Mhic Éadaigh

Scléip Tí Mháire

Beidh an banna ceoil as Conamara, Ceann Gólaim, i dTuar Mhic Éadaigh ag seisiún breá amhránaíochta agus damhsa agus ceoltóirí agus damhsóirí as an áit ina gcomhluadar.

Tí Mháire Luke, Tuar Mhic Éadaigh ag 8in

Oileán Acla

Turas Traid Bus

Tobthuras traid le ceoltóirí óga na háite.

Cuirfear tús leis an turas ag teach tábhairne an Compass, An Corrán, Acaill ag a 9in

Crónán na mBeach

Léacht agus taispeántas le Simon Ó Cróinín faoi cheird na beachaireachta i gcultúr na hÉireann ó ré Naomh Gobnait go dtí an lá inniu. I ndiaidh an léachta beidh seisiún ceoil sa gclub, An Bradán Feasa  mar a mbeidh blaiseadh le fáil den mheá, fíon ársa na nGael agus é déanta as mil na Mí.

Leabharlann Ráth Chairn ag 8-9in

Ciarraí

Ealaín ar an bhFalla

San ardtráthnóna tiocfaidh daoine le chéile lasmuigh d’Óstán Benner ar an bPríomhshráid agus tabharfar chuig láthair sa Daingean iad mar a mbeidh ealaíontóirí Chorca Dhuibhne ag cur bailchríoch ar mhúrmhaisiú nua.

Hotel Benner, Daingean Uí Chúis ag 5.30in

Ceardlann Clódóireachta

Seo seans ag muintir an Daingin scileanna clódóireachta a fhoghlaim leis an ealaíontóir Deirdre McKenna

An Díseart, Sráid an Doirín, Daingean Uí Chúis, ag 4in

Filíocht fhísiúil

Oíche filíochta agus scannánaíochta le Maria Ní Mhurchú agus George Jackson

An Díseart, Sráid an Doirín, Daingean Uí Chúis ag 6in

Ealaín na hAeráide

Taispeántas de chomharthaí lámhdhéanta a rinne óige Chorca Dhuibhne faoi théama na haeráide

An Díseart, An Daingean ag 7in

Mol Teic

Cuirfidh cuid de na daoine a tháinig chugainn thar sáile ag lorg tearmainn a gcuid scéalta féin i láthair agus beidh an seisiún á shruthú ar líne

Mol Teic an Daingin, Páirc Ghnó an Chúilín ag 7in

Cnuasaigh mhóra Chorca Dhuibhne

Tabharfar deis do dhaoine féachaint ar an dá chnuasach speisialta atá sa leabharlann – an Cnuasach Duibhneach, bailiúchán leabhar faoi iarthar Chiarraí agus cnuasach Phádraig Uí Fhiannachta, ina bhfuil macasamhla nó facsimile de lámhscríbhinní, foclóirí luachmhara stairiúla agus ábhar spéisiúil eile as an gceantar.

Leabharlann an Daingin ag 6pm

Oíche chultúir an Bhlascaoid

Beidh clár speisialta á chur i láthair ag Ionad an Bhlascaoid don Oíche Chultúir

Ionad an Bhlascaoid, Dún Chaoin óna 4in

Oidhreacht Chorca Dhuibhne

Oíche cheoil, amhránaíochta, filíochta agus litríochta sa Mhúsaem

Músaem Chorca Dhuibhne, Baile an Fheirtéaraigh ag 8in

Abair Amhrán

Beidh ceardlann amhránaíochta ar an sean-nós le Maeve Ní Dhuinnín á reáchtáil ag Comhchoiste Ghaeltacht Uíbh Ráthaigh in áit dúchais Thomáis Rua Uí Shúilleabháin, file agus údar mór de chuid an cheantair.

Halla Pobail Chathair Dónall, Cathair Dónall, Uíbh Ráthach ag 5in

Scríobh Haiku as Gaeilge!

Ceardlann Haiku le Gabriel Rosenstock. Fáilte roimh fhilí, cainteoirí líofa agus foghlaimeoirí.

Áras Bhréanainn, Baile an Fheirtéaraigh ag 5.30in

Taispeántas ‘Cosáinín na Farraige’

Taispeántas Ealaíne i Mainistir Mhichíl, Baile an Sceilg. Dealbhóireacht ghloine le Róisín Ní Chionnfhaolaidh agus Criadóireacht le Anja Gnauck.

Mainistir Mhichíl, Baile an Sceilg   5in-9in

Ceiliúradh Uíbh Ráthaigh le hÉigse na Brídeoige

Oíche spleodrach cheoil agus amhránaíochta a dhéanfaidh ceiliúradh ar an nasc idir Gaeltachtaí Chorca Dhuibhne agus Uíbh Ráthaigh.

Ionad Pobail na Dromad, An Cillín Liath, Co. Chiarraí ag 8in

Corcaigh

Scéal an Hazelside

Ceiliúradh físiúil ceolmhar agus insint nua ar scéal tarrthála an Hazelsize i 1939.

Club Chléire, Oileán Chléire ag 8in

Cosán Ceoil agus Cultúir i mBaile Mhic Íre

Cosán bríomhar ceoil agus cultúir trí ghnóthaí éagsúla i mBaile Mhic Íre i gcomhluadar ealaíontóirí, ceoltóirí agus rinceoirí an cheantair. Beidh deis agat amhrán nó steip rince a fhoghlaim ar do shlí!

An tIonad Cultúrtha, Baile Mhic Íre, Múscraí, 4pin

Port Láirge

Seisiún Ceoil i mBaile na hArda

Ceoltóirí áitiúla i mbun seisiún ceoil i dTeach Bhaile na hArda.

Teach Baile na hArda, An Sean-Phobal, Co. Phort Láirge ag 9in

Oíche Scoraíochta

Cuirfear fáilte is fiche roimh phobal na nDéise uile go dtí seó ilsiamsa i Halla Cholmáin. Tabharfaidh an seó seo deis do gach duine, idir óg agus aosta, a gcumas agus a dtallanna a léiriú don phobal.

Ionad: Halla Cholmáin, An Sean-Phobal, ag 7in

An Rinn, Co Phort Láirge

Idir an Lionsa agus an Tinteán

Ina dteach féin taispeánfaidh RoseAnn agus Catherine Ní Fhoghlú físeáin ghearra a rinne siad féin, go leor acu bunaithe ar mhuintir an cheantair.

An Rinn, Co. Phort Láirge óna 5in- 6.45in