Bhí súil go mbeadh scíth ag na cúigí ó chomórtas an Pro 14 an deireadh seachtaine seo sula dtosódh chéad bhabhtaí Chorn na gCuradh i gceann seachtaine. Ba cheart go mbeadh fáil freisin ag na cúigí ar na himreoirí idirnáisiúnta don chomórtas sin mura dtarlaíonn aon ghortú dóibh agus iad ag imirt i gcoinne na hAlban i gCorn na Náisiún amárach.
Ach roimhe sin cuirfidh Cúige Chonnacht chun páirce anocht ar an mBóthar Beag i gcluiche Bhabhta 4, cluiche a bhí ar athlá de bharr Covid-19 ó thús na míosa seo caite.
Is cinnte go bhfuil Andy Friend, príomh-oiliúnóir Chonnacht, breá sásta gur sa mbaile atá an cluiche seo i gcoinne Treviso, mar go dtugann sé deis iontach dá fhoireann bua a fháil. Cuimhnigh gur theip go dona ar na Connachtaigh trí seachtaine ó shin i gcoinne na Scarlets (20-14), toradh nach raibh súil ar bith leis agus buntáiste an bhaile ag foireann an iarthair.
Ní féidir é a shéanadh, bhí cur chuige na gConnachtach go huafásach ar fad sa gcluiche sin. D’éirigh leo rudaí a chur ina gceart agus iad san Iodáil seachtain ó shin ach is i gcoinne Zebre, an fhoireann is laige sa gcomórtas, a bhí siad sa gcluiche sin. Is i gcoinne Treviso, foireann eile ón Iodáil atá siad anocht, foireann atá fós ar thóir a gcéad bhua sa gcomórtas agus sé chluiche imeartha acu go dtí seo.
Tá dúshlán mór roimh na cuairteoirí anocht agus iad i gcoinne foireann a bhfuil trí chluiche as cúig cinn buaite acu. Ní hamháin go gcaithfidh na Connachtaigh an cluiche seo a thabhairt leo ach údar mór díomá a bheadh ann mura n-éiríonn leo pointe bónais a fháil freisin. D’fhágfadh sin sa dara háit i nGrúpa B iad.
Cuirfear críoch le Corn na Náisiún an deireadh seachtaine seo. Theip ar fhoireann na tíre seo áit sa chluiche ceannais a chinntiú agus na Sasanaigh agus na Francaigh a imreoidh sa chluiche sin. Cuirfidh Éire chun páirce i Staid Aviva i gcoinne na hAlban chun an tríú agus an ceathrú háit sa gcomórtas a shocrú. Tá dea-thuairisc orainn i gcoinne na hAlban le cúpla bliain anois, ach mar sin féin tá athrú cuimsitheach tagtha ar chur chuige an fhreasúra ó thús na bliana seo. Fágann sin go mbeidh dóthain le déanamh ag foireann Andy Farrell le bua a chinntiú.
Go deimhin má imríonn foireann na hÉireann mar a rinne siad i gcoinne na Seoirsia seachtain ó shin, caillfidh siad an cluiche seo. Ag breathnú dom ar an bhfoireann atá á cur chun páirce ag Farrell, ní móide go dtarlóidh sé sin. Mar sin féin, cé go bhfuil mise ag tuar bua d’fhoireann an bhaile, níl mé cinnte fós cén tairbhe a fuair muid as an gcomórtas nua seo.
Go deimhin má chailleann muid amárach is beag buntáiste a bhí sa tsraith ceithre chluiche seo dhúinn ar chor ar bith.
Fág freagra ar 'Ní dócha go mbeidh Éire chomh dona céanna arís'