Tá féirín againn go deimhin a déarfadh duine leat dá n-inseofá dó go raibh Taoiseach nua tagtha ar an tír agus gan aon mheas aigesean ar an Taoiseach a bheadh i gceist.
Tugtar féirín ar rud luachmhar agus ansin aríst ar rud nach mbíonn luachmhar.
Is milis an féirín an tsláinte agus is searbh a bheith gan í a deirtí. Ach meabhraítí do dhaoine gur furasta féirín a dhéanamh den tsláinte – í a ligean uait nó a chailleadh.
Féirín ón aonach nó píopa tobac – deirtí é sin leis an té a bheadh tagtha abhaile ón aonach , i., gur cheart dó ní éigín a bheith tugtha abhaile aige.
‘Dá mbeadh cúpla gloine ólta agamsa chífeá ná beinn ag éisteacht leat, “ a dúirt cainteoir as Gaeltacht na Mumhan, “ thabharfainnse féirín duit a chuirfeadh ar lorg do mheabhrach thú.” Buille a bhí ar intinn aige ar ndóigh.
“Tá iarlais agat go ceann tamaill sa méir thinn sin,” a dúirt cainteoir eile — féirín de dhroch-shaghas.
Ba mhinic na filí ag tabhairt féirín ar bhean.
In aois a sé déag sea fuair mé féin í,
Ba deas an féirín í ag fear le fáil.
Sin é a dúradh faoi Shail Óg Rua.
Tá féirín le mo chéad searc i mo phóca thíos, a dúirt file eile.
Is cosúil go bhféadfadh buachaill a bheith ina fhéirín freisin. Is ró-dheas an féirín Éamon ag cailín óg a dúradh faoi dhuine acu.
Tá féirín againn go deimhin…Nach deas é?
Fág freagra ar 'NACH DEAS É? Tá féirín againn go deimhin…'