An gcorraíonn mo thóin an gúna seo go deas? Sin ceist a chuirfeas corrbhean a mbeidh gúna nua ceannaithe aici i gcomhair na Nollag. Ní hí an fhírinne an freagra is feiliúnaí go minic i gcásanna den sórt sin.
Tá éadach orthu anois agus ‘bicycles’ faoina dtóin a dúradh nuair a thosaigh an saol ag feabhsú.
Chuir sé a thóin amach a déarfaí faoi dhuine a thuirseodh é féin ag obair.
Dá mbeadh duine le cuthach d’fhéadfaí a rá go raibh a thóin amuigh freisin.
Rith a thóna agus a chinn a bheadh leis an té a mbeadh iomarca cead a chinn aige.
Dá mbeadh duine idir dhá chomhairle bheadh a thóin idir dhá stól.
Tharlódh sé go mbeadh an t-asal ag gabháil dá thóin in airde sa ngarraí.
Síleann sí gur ar a thóin a éiríonn an ghrian a déarfaí faoi bhean a mbeadh moladh rómhór aici ar a grá geal.
D’fhéadfadh daoine a bheith ag éirí as tóin fír nó mná i.e., ag déanamh Dia beag den duine sin.
Dá gcuirfeá do thóin ar an ngealach ní bhfaighidh tú é, a déarfaí le duine nach mbeadh aon sásamh á thabhairt dó.
Tóin le talamh a thugtaí ar bhean nó ar fhear nach mbeadh mórán airde iontu.
Fág freagra ar 'NACH DEAS É? Rith a thóna agus a chinn leis…'