NACH DEAS É? Putóga dubha na Gaeilge

Dá gcloisfeá caint ar phutóga dubha na Nollag b’fhéidir go gceapfá gur bia blasta i gcomhair na féile a bheadh i gceist. Bíonn putóg na Nollag ann ar ndóigh ach sa gcás seo cur síos a bhíonn á dhéanamh ar laethanta dubha aimsir na Nollag.

Bíonn gearróga dubha na Nollag ann timpeall seachtain roimh is i ndiaidh an lae is giorra sa mbliain.

Is é dubhluachair na bliana an tréimhse idir Nollaig agus Féile Bríde.

Seascach na gcearc a bhíonn ann ó Shamhain go Nollaig.

Is úr na broibh go Nollaig.

Mar a bhíonn dhá lá dhéag na Nollag, beidh dhá mhí dhéag na bliana.

Tagann fad coiscéim coiligh ar an lá ó Lá Nollag Beag amach.

Bia is deoch faoi Nollaig, is éadaí nua faoi Cháisc.

Oíche Inide gan feoil,

Lá Nollag Mór gan im,

Domhnach Cásca gan arán,

Sin é an bothán lom.