Dá gcloisfeá duine a rá gur mór an aicíd é níor cheart dhuit a cheapadh ar an bpointe gurb é Covid-19 a bheadh i gceist. Déarfaí é freisin faoi áit a bheadh salach.
Is iomaí sin cineál aicíde ann:
Aicíd na gcnámh (na scoilteacha), aicíd an chronaithe (an cnaíghalar). Chreidtí gur asarlaíocht ba chúis leis an gcnaíghalar.
An aicíd dhubh—dúchan ar na prátaí.
Aicíd na scamhóg – niúmóine…
Aicíd an tochais.
Aicíd chriothannachta – an fiabhras creathach.
Aicíd an pheaca.
Aicíd an bháis.
Aicíd an Éireannaigh—dúil an chait san ólachán. Tá dúil aige san ól. Is iomaí duine ar a aicíd a deirtí.
Aicíd thógálach.
Aicíd an díth eolais.
Caitheann an óige an aicíd, a deirtí – gabhann an óige trí gach uile shórt, galraí, anró, srl is tagann sí slán.
Chreideadh na filí go láidir gur aicíd a bhí sa ngrá. Seo mar a dúirt duine amháin acu:
Deir lucht léinn gur claoite an galar an grá,
Char admhaigh mé é nó go raibh sé i ndiaidh mo chroí istigh a chrá,
Aicíd ró-ghéar, faraor, níor sheachnaigh mé í.
Is go gcuireann sí arraing is céad go géar fríd cheartlár mo chroí.
Ar an gcaoi seo a chuir file eile é, ‘Cé gur shíl mé lán de m’aicíd go leigheasfása í’.
Bhí file eile ann a dúirt, ‘A chéadsearc ná tréig mé is gur mhéadaigh tú m’aicíd.’
A rún mo chléibh a chuir na céadta in aicíd, a dúirt Cearbhallán.
Bhí tóir ag Cearbhallán ar na mná ach bhí tóir ar an bhfuisce aige freisin. Seo mar a dúirt sé faoi sin:
‘Is íocshláinte an fuisce a leigheasas agus a shlánaíos
Gach tinneas agus aicíd a leanas síol Ádhamha.’
Níl tinneas, níl aicíd, níl galar ná éag ann, a dúirt Raiftearaí agus é ag moladh Chill Aodáin.
Chuir sé mallacht ar bheirt freisin ar an gcaoi seo:
‘Aicíd is plá orthu, ruaig is léan.’
M’aicíd orthu, an calar orthu, nár thé an phlá tharstu a déarfadh daoine eile go dtínár linn féin go deimhin.
Ní fios cé a chum an rann seo:
Tiocfaidh an t-anti-Christ,
Tiocfaidh an cogadh,
Tiocfaidh an phlá,
Tiocfaidh an gorta,
Is beidh an saol ar chomhchreideamh ansin.
Seo roinnt leaganacha cainte eile a bhfuil an focal aicíd iontu:
I dtosach na haicíde is fusa a leigheas. Comhairle í sin a chuaigh amú ar chuid den lucht údaráis a bhí ag troid an víris a bhfuil muid cráite aige faoi láthair.
Tá a hoideas féin ann do gach aon aicíd. Tá súil againn go bhfeicfidh muid cruthú láidir air sin i rith na bliana atá romhainn.
Mar bhuille scoir, seo leagan cainte nár mhiste do chuid den chléir aird a thabhairt air:
D’ordaigh Dia an aicíd a sheachaint.
Is mór an aicíd é. Nach deas é?
Fág freagra ar 'NACH DEAS É?: Is mór an aicíd é…'