NACH DEAS É? Is minic a chuir gunna folamh faitíos ar bheirt

Bhí sí sioctha leis an eagla, a deirtear.

D’fhéadfá a rá freisin go raibh eagla a craicinn uirthi. Tharlódh sé nach raibh sí in ann corraí le faitíos. Bí cinnte go raibh sí ag crith le heagla.

B’fhéidir gur eagla a bhí uirthi gur drochscéala a bheadh ann nuair a chonaic sí duine áirithe – go raibh a croí ina béal go deimhin nuair a chonaic sí é.

Bíonn eagla ar chuid de na daoine a dhul amach san oíche. Bíonn eagla an bháis ar dhaoine eile, nó eagla a n-anama, nó eagla an domhain, nó eagla a gcroí, eagla na báistí nó eagla an bhuailte.

‘Tá faitíos orm dhuit’ a chloisfeá duine a rá le duine eile – ag cur i gcéill go mbeadh contúirt ar an duine sin, nó go mbeadh dul amú air.

D’fhéadfadh duine a rá go raibh uamhan nó scanradh air.

Daoine misniúla amach is amach nach mbíonn fuacht ná faitíos orthu.

Seo roinnt leaganacha cainte eile a bhfuil an focal faitíos nó an focal eagla iontu:

Níl iasc sa bhfarraige is mó a bhfuil faitíos ag na soithí roimhe ná an bairneach—de bhrí gur ar na carraigeacha a chothaíonn sé.

Is minic a chuir gunna folamh faitíos ar bheirt—bíonn faitíos roimh ghunna i gcónaí bíodh sé lán nó folamh.

Bíodh faitíos ort agus ní baol dhuit—ní ghabhfaidh cladhaire i gcontúirt.

Is furasta faitíos a chur ar chladhaire.

Is fearr scáth ná faitíos.

Is maith an grá é an faitíos.

Bíonn faitíos ar an leanbh dóite roimh an tine.

An té a bhuailtear sa gceann bíonn faitíos air.

Ar eagla na heaspa is maith a bheith coimeádach.

Is mairg a mholfadh le heagla go gcáinfeadh – ná mol duine ar bith ar fhaitíos go mbeadh ort é a cháineadh amach anseo.

Dúirt an Duinníneach gur faitíos an focal a bhí ag na Connachtaigh agus eagla ag na Muimhnigh. Fágfaidh mé mar sin an scéal ar eagla na heagla nach raibh an ceart aige.