NACH DEAS É? Bruth is teas tús tinnis…

D’fhéadfadh bruth tarta a bheith ar dhuine, go háirithe bruth an óil – tart na póite. Tagann bruth as tinneas. Bruth is teas tús tinnis, a deirtear.

Tagann bruth toirní scaití—meirbhe san aimsir roimh thoirneach.

D’fhéadfadh bruth míoltóga a bheith in áit. Is é sin le rá go mbeadh go leor nó púir acu ann.

Bhíodh caint sna seanscéalta ar chlaíomh na seacht mbrutha. Chaithfeadh sé gur claíomh a bhí ann a raibh faobhar maith air.

Bruth faoi thír a thugtar ar an bhfeamainn nó an turscar a thugann nó a chuireann an tonn i dtír.

Bruth farraige í an tonn mhór a bhíonn ag coipeadh agus ag bruth agus ag briseadh, mar a dúirt an file Mícheál Mac Suibhne:

‘An tú Neptune ón muir bháite/ Thóigeas bánbhruth le neart na gaoith?’

Nuair a bhíonn na fataí ag fás go maith deirtear go mbíonn siad ag teacht aníos ina mbruth.

Bruth a thugtaí ar dheoch a dhéantaí le plúr is bainne do pháistí.

Tharlódh sé go mbeadh bruth féasóige ort agus go dteastódh tú a bhearradh.

Tá bruth a ladhar [bruith laidhre] air a déarfaí faoi dhuine a mbeadh deifir air.

Bheadh leat dá mbeifeá lán de bhruth agus de bhorradh.

Dá ndéarfaí gur tháinig an bruth ar fad ort b’ionann sin agus a rá go raibh tú ag déanamh neamhshuim de chúrsaí.

Bruth a thugadh cuid de na daoine ar an lios nó an garraí a bhíonn ar an ngealach.