NACH DEAS É? Bhí scoil mhaith Bhéarla aige…

Dá gcloisfeá ráite é faoi bhean eicínt go bhfuair sí scoil níor cheart duit a cheapadh láithreach gur múinteoir a bhí intí a bhí ar thóir poist agus gur éirigh léi scoil fheiliúnach a aimsiú sa deireadh. D’fhéadfadh sé gurb éard a bheadh i gceist ag an gcainteoir gur bean a bhí inti ar cuireadh […]

NACH DEAS É? Bhí scoil mhaith Bhéarla aige…

Dá gcloisfeá ráite é faoi bhean eicínt go bhfuair sí scoil níor cheart duit a cheapadh láithreach gur múinteoir a bhí intí a bhí ar thóir poist agus gur éirigh léi scoil fheiliúnach a aimsiú sa deireadh. D’fhéadfadh sé gurb éard a bheadh i gceist ag an gcainteoir gur bean a bhí inti ar cuireadh oideachas uirthi.

Ní raibh focal scoile ar bith aige/aici a deirtí. Ní raibh mé ag an scoil ariamh agus níl aon scoil agam, a déarfadh duine eile. Bhí scoil mhaith Bhéarla aige. Bhí an t-an-scoil Ghaeilge aige.

Cailín óg í a fuair scoil is foghlaim a dúradh san amhrán faoi Mháirín Seoighe.

Thug mé scoil dhuit is beagán múinte, a dúirt Máire Ní Mhongáin san amhrán agus í ag caoineadh duine dá clann mhac a bhí imithe gan tuairisc thar lear.

Thógadar le scoil agus léann é a dúradh faoi mhac i scríbhinn eile.

Nuair a bhí mise agus mo dheartháir inár mbuachaillí scoile bhíodh ár n-athair a’ rá lenár máthair agus é leath dháiríre gur iomarca scoile a bhí ag dul orainn.

‘Ní bheidh siad in ann iomaire fhataí a chur, móinfhéar féir a spealadh ná portach móna a ghróigeadh,’ a deireadh sé.

‘Má bhíonn oideachas orthu gheobhaidh siad post in áit eicínt,’ a deireadh sise.

‘An fhad agus a bheadh an oiread scoile acu agus a chuirfeadh marc ar an gcaora bheadh a ndóthain ann,’ a d’fhreagraíodh seisean.

Ba í teoiric m’athar ar bhealach a bhí ag Gearmánach a bhí ag siompóisiam faoi chúrsaí oideachais in ollscoil anseo in Éirinn. Bhí ollamh ag déanamh gaisce as an líon an-mhór daoine a bhfuil céim ollscoile acu sa tír seo.

‘Yes,’ a dúirt an Gearmánach ‘but who will do the vork?’

Fág freagra ar 'NACH DEAS É? Bhí scoil mhaith Bhéarla aige…'