Tá na socruithe do chluiche mór Naomh Anna, Leitir Móir ar an deireadh seachtaine fógartha ag Cumann Pheil na mBan i nGailliimh.
Imreofar cluiche ceannais na craoibhe idirmheánaí idir Naomh Anna agus Mionlach-An Sceachánach Dé Sathairn beag seo, an 26 Meán Fómhair, ag 4.30i.n. in Uachtar Ard.
Ní bheidh cead isteach ag an gcluiche ach 100 duine mar lucht féachana ach tá sé i gceist beoshruthú a dhéanamh ar an gcluiche ar leathanach Facebook LGFA na Gaillimhe.
Beidh deis ag foireann ban Naomh Anna ar an Satharn áit a bhaint amach sa Chraobh Shinsir tar éis dóibh an ceann is fearr a fháil ar Thuaim-An Cartún sa bhabhta leathcheannais Dé Sathairn seo caite.
Bua aon phointe amháin a bhí ag Naomh Anna, 1-8 in aghaidh 1-7, agus ba í an t-imreoir idirchontae Sarah Ní Loingsigh a fuair an scór cinniúnach ó chic saor leis an mbuille deireanach sa chluiche.
Níl ach dhá bhliain ann ó bhí mná Leitir Móir ag imirt sa Chraobh Shóisir agus in 2018 a d’éirigh leo ardú céime a bhaint amach.
Fág freagra ar 'Na socruithe déanta do chluiche ceannais peile mhná Leitir Móir'