Tá cluiche fhoireann idirnáisiúnta na hÉireann in aghaidh na hIodáile curtha ar athlá mar gheall ar an ngalar Covid-19, ach, aisteach go leor, tá an dá chluiche eile sa gcomórtas á n-imirt an deireadh seachtaine seo. Fágann sin go mbeidh an Bhreatain Bheag ag taisteal go Twickenham himirt le himirt i gcoinne na Sasanach. Má bhíonn an bua ag foireann an bhaile, toradh atá á thuar ag go leor, is acu freisin a bheas an Choróin Triarach. Is fiú smaoineamh nár bhuaigh foireann na Breataine Bige ach cluiche amháin sa gcomórtas go dtí seo. Sa mbaile a bhí na Breatnaigh sa gcluiche sin i gcoinne na hIodáile, foireann atá ar íochtar thábla an chomórtais faoi láthair. Chaill na Breatnaigh agus iad sa mbaile i gcoinne na bhFrancach agus is as baile a bhí siad nuair a bhí bua deich bpointe ag Éirinn orthu. Is deacair dá bhrí a shamhlú go mbeidh an bua acu inniu.
Mar sin féin, d’éirigh leis na Breatnaigh babhtaí leathcheannais an Choirn Dhomhanda a bhaint amach agus más féidir leo filleadh ar an stíl imeartha sin arís beidh seans éigin acu. Ach i mo thuairimse, ní mór an seans é. Tá na Sasanaigh róláidir agus iad sa mbaile.
Amárach, Dé Domhnaigh, a bheas foireann ógánach na Fraince ag imirt i Murrayfield. Bhí bua maith (17-0) ag Albain agus iad as baile i gcoinne na hIodáile i mBabhta 3 ach is dúshlán de chineál eile a bheidh le sárú acu amárach. Tá na Francaigh ag taisteal go Dún Éideann agus iad lán de mhuinín agus de dhóchas. Is iad an t-aon fhoireann amháin nár chaill cluiche ar bith fós. Má imríonn siad mar a rinne siad i mBabhta 3 agus iad as baile i gcoinne na mBreatnach is deacair a shamhlú nach mbeidh an lá leo.
Tá mise ag tuar bua d’fhoirne Shasana agus na Fraince an deireadh seachtaine seo.
Fág freagra ar 'Na Sasanaigh róláidir agus iad sa mbaile'