Míshásamh faoi aistriú campaí samhraidh chuig Muintearas – Seanadóir

Tá míniú iarrtha ar Aire Stáit na Gaeltachta, Joe McHugh, T.D., faoin gcinneadh riaradh Scéim na gCampaí Samhraidh sa Ghaeltacht a aistriú ó Roinn na Gaeltachta chuig Muintearas.

Tá an Seanadóir Trevor Ó Clochartaigh tar éis sraith de 12 de cheisteanna a chur chuig an Aire i scríbhinn ina n-iarrann sé bunús an chinnidh agus eolas breise faoin bpróiseas faoinar roghnaíodh Muintearas don chúram seo.

Dúirt an Seanadóir Ó Clochartaigh leis an Aire ina litir go bhfuil “míshásamh go leor” ann maidir leis an gcaoi a bhfuil an t-aistriú seo tarlaithe agus leis “na himpleachtaí a bhaineann leis an gcinneadh”.

Dúirt Ó Clochartaigh freisin go bhfuil cuid mhaith daoine tar éis teagmháil a dhéanamh leis, lucht na gcampaí féin ina measc, d’fhonn a n-imní faoin gcinneadh a chur in iúl dó. Dúirt sé go raibh lucht na gCampaí “drogallach na ceisteanna seo a ardú go poiblí” ar eagla go mbeadh “tionchar diúltach” aige sin ar aon iarratas a dhéanfaidís ar mhaoiniú amach anseo.

Teastaíonn ón Seanadóir Ó Clochartaigh go míneodh an tAire dó cé a rinne an cinneadh faoin ábhar agus agus má rinneadh athbhreithniú ar riaradh na scéime, an bhfuil aon tuairisc ar a thorthaí sin le fáil.

D’fhiafraigh sé den Aire an raibh aon imní air faoi choimhlint leasa a bheith ann de bharr go mbíonn Muintearas féin ag plé le campaí samhraidh. Cheistigh sé freisin an buntáiste a bheidh le fáil ag pobal na Gaeltachta as an gcinneadh chomh maith le ceisteanna faoi chúrsaí buiséid.