Bhí údar ceiliúrtha ann do Tuairisc ag Gradaim Chumarsáide an Oireachtais a bhí ar siúl i gCill Airne anocht agus gradam tugtha léi ag Méabh Ní Thuathaláin.
Roghnaíodh Ní Thuathaláin mar ‘Iriseoir na Bliana’ ag an ócáid bhronnta agus aitheantas tugtha don obair atá déanta aici le Tuairisc agus leis an gclár cúrsaí reatha 7Lá le bliain anuas.
Ceithre cinn déag de ghradaim a bronnadh ag an searmanas a bhí ar siúl in Ionad an INEC.
Cuireadh tús leis an oíche le píosa ómóis do Rónán Mac Aodha Bhuí, an sárchraltóir a bhásaigh le déanaí, agus tugadh chun cuimhne go minic é le linn na hócáide. ‘Dorn san aer!’, rosc catha Rónáin, an rud is mó a chualathas ón stáitse anocht, mar chomhartha ómóis don laoch ar lár.
Bronnadh gradam speisialta ar an gclár Blas ar BBC Gaeilge atá 25 bliain ar an bhfód i mbliana agus is ar an iriseoir agus craoltóir as Béal Feirste, Eoghan Ó Néill, a bronnadh Buaic-Ghradam Cumarsáide an Oireachtais.
Thug Neansaí Ní Choisdealbha, a bhíonn le cloisteáil ar RTÉ Raidió na Gaeltachta, léi an duais do ‘Phearsa Raidió na Bliana’ agus bhí an lá le Sinéad Ní Uallacháin, láithreoir na sraithe Beidh mé ar ais ar TG4, i rannóg na gcraoltóirí teilifíse.
An tráchtaire spóirt aitheanta Brian Tyers a bhuaigh an gradam do ‘Chraoltóir Solabhartha na Bliana’.
An scannán Róise & Frank, a léirigh Macalla Teo, a bhuaigh an gradam do ‘Scannán na Bliana’ agus ba ar an gclár Séamus Mac Murchaidh: Díolta faoina Luach, a léirigh Macha Media, a bronnadh an gradam do ‘Chlár Teilifíse na Bliana’.
Lucht an chláir An Cúinne Dána ar Raidió na Gaeltachta, a bhíonn á chur i láthair ag Tristan Rosenstock, a thug an chreach leo as rannóg ‘Sraith Raidió na Bliana’.
Bláth na hÓige, sraith a léirigh Aniar TV do TG4, a tháinig sa chéad áit sa rannóg ‘Sraith Teilifíse na Bliana’.
Bhuaigh Filí Chonamara, a chraoltar ar Raidió Pobail Chonamara, an duais sa rannóg ‘Clár Gaeilge na Bliana ar Raidió Pobail’.
Is ag Splanc le Cuán Ó Flatharta ar Newstalk a bhí an bua sa rannóg ‘Clár Gaeilge na Bliana ar Raidió Tráchtála’.
Ar Cholm Mac Giolla Easpuic, aisteoir ar Ros na Rún agus craoltóir le Raidió na Gaeltachta, a bronnadh Gradam Réalta Óg na Bliana, gradam ar vótáil an pobal dó.
Seo thíos liosta iomlán na mbuaiteoirí do Ghradaim Chumarsáide an Oireachtais 2023.
Aedín Ní Thiarnaigh – NÓS Clár Teilifíse na Bliana Séamus Mac Murchaidh: Díolta faoina Luach – Macha Media Scannán na Bliana Róise & Frank – Macalla Teo Sraith Raidió na Bliana An Cúinne Dána – RTÉ Raidió na Gaeltachta Iriseoir na Bliana Méabh Ní Thuathaláin – Tuairisc & 7Lá ar TG4 Pearsa Raidió na Bliana Neansaí Ní Choisdealbha – RTÉ Raidió na Gaeltachta Pearsa Teilifíse na Bliana Sinéad Ní Uallacháin – Beidh mé ar ais Clár Gaeilge na Bliana Ar Raidió Pobail Filí Chonamara – Raidió Pobail Chonamara Clár Gaeilge na Bliana Ar Raidió Tráchtála Splanc le Cuán Ó Flatharta – Newstalk Sraith Teilifíse na Bliana Bláth na hÓige – Aniar TV Gradam Speisialta Blas – BBC Gaeilge Craoltóir Solabhartha na Bliana Brian Tyers – TG4 Réalta Óg na Bliana Colm Mac Giolla Easbuic – Ros na Rún & RTÉ Raidió na Gaeltachta Buaic-Ghradam Cumarsáide an Oireachtais Eoghan Ó Néill
Siob
Comhghairdeas leat agus le gach duine in Tuairisc. Togha oibre lá i ndiaidh lae.
jpmorley0@gmail.com
Nár laga Dia ná duine sibh a chairde na páirte!
Mags
Iriseoir den Scoth! 🎉
Kevin Hickey
Comhghairdeachas leat, a Mhéabh!