Mair a chapaill agus gheobhair pas! Moill mhór ar eisiúint pasanna do chapaillíní Chonamara

Tá an Roinn Talmhaíochta ag iarraidh dul i ngleic leis an scéal go mbíonn moill mhór ar phasanna a eisiúint do chapaillíní Chonamara.

Mar chuid dá gclár póraithe, déanann Cumann Capaillíní Chonamara coimisiúnú ar thástáil DNA do gach capall a chláraíonn siad.

Déantar na tástálacha seo i saotharlann ar leith agus thug an tAire Talmhaíochta Michael Creed le fios an tseachtain seo go mbraitheann an t-am a thógann sé ar an gCumann na pasanna a eisiúint ar obair na saotharlainne.

De réir dlí ní ceadmhach pas a eisiúint do chapall go dtí go mbíonn torthaí na tástála DNA ar fáil.

Dúirt an tAire Creed gur chuir a Roinn maoiniú ar fáil i mbliana do Chumann Capaillíní Chonamara chun cuidiú leo i dtaca leis an gcóras tástála DNA.

Dúirt Creed gur thug Cumann Capaillíní Chonamara le fios dá Roinn le déanaí go raibh socruithe á gcur i bhfeidhm a laghdódh an mhoill a bhíonn ar phasanna a eisiúint do chapaillíní Chonamara.

Ba é an Teachta Dála de chuid Fhianna Fáil Éamon Ó Cuív a cheistigh an tAire faoin moill ar na pasanna do chapaillíní Chonamara.