Leasú ar fhógra conartha do sheirbhís aeir d’Oileáin Árann agus tairiscintí Gaeilge ceadaithe anois ann

Tá leasú déanta ar an bhfógra conartha do sheirbhís aeir d’Oileáin Árann tar éis do Tuairisc.ie ceisteanna a chur ar Roinn na Gaeltachta, ceisteanna a chaith amhras ar bhailíocht an fhógra inar tugadh le fios gur i mBéarla amháin a ghlacfaí le tairiscintí.

San fhógra sin don chonradh aersheirbhíse, a foilsíodh Dé hAoine seo caite, dúradh nár cheadmhach d’iarrthóirí ach tairiscint nó iarratas a dhéanamh i mBéarla.

Tá an méid sin leasaithe anois agus an téacs seo a leanas curtha leis an bhfógra conartha ar an suíomh etenders.gov.ie:

“Tenders may be submitted in either the English or Irish language“ as per the Request for Tender Document.”

Ba í an Oifig um Sholáthar Rialtais ‘thar ceann’ an Aire Ealaíona, Oidhreachta agus Gaeltachta, a thug an cuireadh chun tairiscintí don chonradh nua ar an suíomh etenders.ie Dé hAoine seo caite.

Dúirt urlabhraí ó Roinn na Gaeltachta le Tuairisc.ie gur “chóir ceisteanna a bhaineann leis an bpróiseas tairisceana a chur chuig an Oifig um Sholáthar Rialtais”.

Nuair a cheistigh Tuairisc.ie an Oifig um Sholáthar Rialtais faoin scéal dúradh gur cheart ár gceisteanna a chur ar Roinn na Gaeltachta.

Faoi fho-alt 9(2) d’Acht na dTeangacha Oifigiúla 2003, tá sé de cheart ag ball den phobal go dtabharfadh comhlacht poiblí freagra i nGaeilge ar chomhfhreagras i scríbhinn nó leis an bpost leictreonach a dhéantar sa teanga sin.

Dúirt an Coimisinéir Teanga Rónán Ó Domhnaill le Tuairisc.ie nach béas lena oifig tagairt do chásanna nach bhfuil gearán ón bpobal faighte ina dtaobh, ach dheimhnigh sé nach bhfuil cead ag comhlacht poiblí a éileamh gur i dteanga oifigiúil amháin a dhéanfaí cumarsáid leis.

“Ní féidir le comhlacht poiblí aon chonstaic ná caiteachas breise a leagan ar bhall den phobal de thoradh gur roghnaigh siad comhfhreagras a dhéanamh i dteanga oifigiúil de chuid na tíre seo.

“Is ar an gcomhlacht poiblí féin a thiteann an dualgas a chinntiú go bhfuil córais chuí in áit acu chun aistriúchán cruinn a dhéanamh sa chás go dteastódh sin uathu.  Leagadh síos an bunphrionsabal seo in imscrúdú a rinne an Oifig [Oifig an Choimisinéara] le linn na bliana 2008,” a dúirt an Coimisinéir Teanga.