FÍSÉAN: Leagan Maracach de Sí do Mhamó í!

Tabharfaidh seisear ceoltóirí an bóthar orthu féin mar chuid d'oilithreacht siamsa ar an gcoigríoch agus iad ar 'Ceolchuairt' ar TG4 anocht

Tá leagan Gaeilge den amhrán tradisiúnta Maracach ‘Sí do Mhamó i measc na n-iontas sa dara sraith den chlár Ceolchuairt, a chraolfar ar TG4 anocht,

I ngach aon cheann de na cláracha faisnéise 40 nóiméad sa tsraith , tugann ceoltóir traidisiúnta Gaelach camchuairt tíre eile air féin, féachaint an bhfuil an cineál céanna ceoil le fáil san imigéin is a fhaightear abhus. Gealltar gur turas eolais agus tuisceana atá i gceist, áit a mbuaileann Éireannaigh le scoth na gceoltóirí áitiúla ar an gcoígríoch agus leis na seanóirí atá ag caomhnú an cheoil ansin.

Bíonn seisiúin buscála ar bun acu ar mhórshráideanna na n-ionad ceoil seo, ó Mharacó go dtí an Mhongóil, ó Iamáice go dtí an tSairdín, agus ón bPortaingéil go dtí an Airgintín.

Sa chéad eagrán, téann Fiachna Ó Braonáin ar thóir phréamhacha na Blues i Maracó. Is ar bharr shléibhte Rif a lorgaíonn sé sean-naisc le hamhránaíocht ar an sean-nós agus a chasann sé le Máistir-Cheoltóirí Joujouka ar oíche lán gealaí.

“Deis den scoth a bhí anseo chun mé féin a thomadh i gcultúr Mharacó agus dul ‘ag snámh’ ann – bhí an oilithreacht seo lán de dhathanna agus d’fhuaimeanna, rithimí agus foinn nár bhlais mé riamh cheana – ach atá anois mar chuid díom,” a dúírt Fiachna.

Sa dara eagrán den chlár, téann an file tuaisceartach Gearóid Mac Lochlainn  sa tóir ar fhréamhacha Reggae i Iamáice, an ceol is ansa leis féin ó bhí sé sna déaga.

An  t-amhránaí ar an sean-nós Róisín Elsafty atá romhainn sa tríú eagrán agus an gaol idir a cuid amhránaíochta féin agus stíl chanta Fado na Portaingéile á fhiosrú aici.

Téann Daire Bracken, an fidiléir leis an ngrúpa Slide ar oilithreacht chuig machairí bánta an Mhongóil agus é sa tóir ar an bhfidil ceann capaill a dtugtar an Morin Khuur uirthi sa cheathrú clár  agus an tseachtain dar gcionn tugann an píobaire aitheanta Mick O’Brien “faoi thóraíocht taisce cheolmhar timpeall ar oileán na Sairdíne agus é ag iarraidh dul i ngleic le píobaí na Launeddas – na píobaí is bunúsaí dá bhfuil ann”.

Sa chlár deireanach den sraith, beartaíonn Máire Áine Ní Iarnáin “scíth a thabhairt dá bróga damhsa ar an sean-nós agus a sála arda a chaitheamh ar feadh scaithimh agus í ar oilithreacht damhsa chun na hAirgintíne, an áit ar tháinig an damhsa Tango ar an saol ar dtús”.

Deir stiúrthóir na sraithe Paddy Hayes: “Is malartú ceoil agus cultúir atá i gCeolchuairt nach bhfeictear rómhinic ar an scáileán. Go minic sa tsraith seo, caitheann muid na ceoltóirí le chéile gan mórán ullmhúcháin; díríonn muid na ceamaraí orthu – agus níos minicí ná a mhalairt, draíocht a thoradhsean.”

Dar le Laura Ní Cheallaigh, gurb é an rud atá “áirithe” faoin sraith seo nach bhfuil lucht a déanta” ag lorg naisc le stíleanna ceoil Ceilteacha eile” ach ag dul “níos faide i gcéin sa tóir ar naisc le stíleanna atá an-éagsúil lena chéile”.

– Cuirfear tús leis an dara séasúr den tsraith Ceolchuairt ar TG4 ag 9.30 pm anocht, Dé Máirt an 13 Eanáir

Fág freagra ar 'FÍSÉAN: Leagan Maracach de Sí do Mhamó í!'