Is fíorphribhléid é an teaghlach a fheiceáil ag fás

Céard í an chuimhne is mó a bheidh agat ar 2024?
Tá an oiread sin cuimhní galánta agam ó 2024, ach ag glacadh le Corn Uí Riada den tríú huair i gCill Airne, bhí sé sin speisialta.

Céard é an scéal is mó a chuir áthas ort in 2024?
An scéal is mó a chuir áthas orm i mbliana ná breith mo gharmhic agus an nuacht go mbeidh garpháiste nua againn sa bhliain úr. Is fíorphribhléid é an teaghlach a fheiceáil ag fás, rud a thugann solas agus dóchas i gcónaí.

Céard é an scéal is mó a chuir brón ort i 2024?
Chuir an bás agus scrios in Gaza brón orm. Is deacair creidmháil an fhulaingt a bhíonn ar dhaoine, go háirithe ar na páistí.

Cén tír nó áit speisialta ar thug tú cuairt air i mbliana?
Thaistil mé go forleathan timpeall na hÉireann i mbliana, ag baint sult as áilleacht iontach an Wild Atlantic Way. Chuir na radharcanna fiáine draíocht orm. Ina theannta sin, thug mé cuairt ar Medugorje, áit ar leith a bhfuil draíocht agus síocháin ag baint leis. Is cuimhní luachmhara iad.

Ó thaobh cúrsaí cultúir agus siamsaíochta de, cad iad na cláir, leabhair nó podchraoltaí is mó a chuaigh i bhfeidhm ort i mbliana?
Chuir RTÉ Raidió na Gaeltachta agus TG4 cláracha cultúrtha iontacha ar fáil i mbliana. Bhain mé fíorthaitneamh as na hathchraoltaí ó chartlann na seanchláracha. Bhí sé deas na guthanna sin a chloisteáil arís, go háirithe guthanna na ndaoine nach maireann, agus an Ghaeilge shaibhir álainn a bhí acu.

Céard é an rud is mó a d’fhoghlaim tú i mbliana?

D’fhoghlaim mé go leor, amhráin agus scéalta úra. Tá taisce de scéalta agus amhráin ghalánta amuigh ansin, agus tá sé go deas iad a chur leis an méid atá agam cheana féin, agus ar ndóigh, beocht agus anam a thabhairt dóibh arís.

Ar éirigh leat déanamh de réir aon rún a bhí agat ag tús na bliana?

Bhí rún spraíúil againn – shocraigh muid ag tús na bliana stampaí a bhailiú sa leabhar Wild Atlantic Way. Tá an taisteal ar fud na hÉireann déanta againn cúpla huair thar na blianta, ach bhí sé galánta na radharcanna agus na háiteanna iontacha a fheiceáil arís agus an stampa cáiliúil don Wild Atlantic Way Passport a fháil.