Gradam saoil an Gaelic Writers Association le bronnadh ar Mhártan Ó Ciardha

Tá gradam saoil á bhronnadh ar iar-eagraí spóirt RnaG agus colúnaí Tuairisc.ie as feabhas a shaothair le beagnach 40 bliain anuas

Gradam saoil an Gaelic Writers Association le bronnadh ar Mhártan Ó Ciardha

Tabharfar aitheantas speisialta do dhuine de na craoltóirí agus iriseoirí is aitheanta i saol na Gaeilge i mBaile Átha Cliath anocht agus ‘Gradam Saoil’ an Gaelic Writers Association le bronnadh ar Mhártan Ó Ciardha, iar-eagraí spóirt RTÉ Raidió na Gaeltachta agus colúnaí le Tuairisc.ie.

Bronnfaidh Cumann Scríbhneoirí Gael an ‘Gradam Saoil’ ar iar-eagraí spóirt RTÉ Raidió na Gaeltachta ag ócáid speisialta in Óstán an Jackson Court.

Tá an gradam saoil á bhronnadh ar Ó Ciardha mar aitheantas as feabhas a shaothair le beagnach 40 bliain anuas agus é ag plé le cúrsaí CLG ar an raidió agus sna nuachtáin.  

Deir Ó Ciardha go mór an onóir dó an t-aitheantas a fháil, go háirithe agus é roghnaithe don ghradam ag iriseoirí eile. 

“Tá mé an-sásta an gradam seo a fháil ó na daoine a chleacht an cheird chéanna liom.

“Tá mé an-bhuíoch de na heagraíochta uile a thug na deiseanna dom a fuair mé, go háirithe RTÉ Raidió na Gaeltachta. Agus freisin, do mo bhean agus mo chlann a thug chuile cúnamh i gcaitheamh na mblianta sin,” a dúirt Ó Ciardha.

Thosaigh Mártan Ó Ciardha, arb as Indreabhán i gConamara ó dhúchas é, ag obair le RTÉ Raidió na Gaeltachta i 1978. Ó shin, go dtí gur éirigh sé as in 2009, rinne Ó Ciardha tráchtaireacht i nGaeilge agus i mBéarla don chraoltóir náisiúnta ar chuid de mhórócáidí an spóirt, cluichí ceannais na hÉireann, Craobhacha Sacair an Domhain agus Cluichí Oilimpeacha ina measc. 

Scríbhneoir aitheanta is ea Ó Ciardha chomh maith agus tréimhsí caite aige ag scríobh do Amárach agus Foinse. Tá sé ina phríomhcholúnaí spóirt le Tuairisc.ie ó bunaíodh an tseirbhís nuachta ar líne trí bliana ó shin. Bíonn a chuid saothar le feiceáil i gcláir chluichí CLG chomh maith. 

Bhronn CLG gradam saoil ar Ó Ciardha mar chuid de Gradaim MacNamee in 2008.  

Bronnfar gradaim ‘Iománaí na Bliana’ agus ‘Peileadóir na Bliana’ ag ócáid Chumann na Scríbhneoirí Gael anocht chomh maith. 

Fág freagra ar 'Gradam saoil an Gaelic Writers Association le bronnadh ar Mhártan Ó Ciardha'

  • Seán Míchaél Ó Donnchadha

    Maith thú a Mhártain, tá an gradam seo tuillte go maith agat.

  • Mike P O Conaola

    Go maire tu do nuacht a Mhartan. Eacht deanta agat bail o Dhia ort. O Mhike P O Conaola

  • Helen

    Ard fhear a Mhártan. Is dochas go mbeidh sibh i Coppers anocht.

  • Bríghid Uí Fhátharta

    Comhghairdeas o chroī leat a Mhārtan

  • Eilís ní Anluain

    Treise leat a Mhártain

  • Sinéad Ní Chualáin

    Comhghairdeas a Mhártan. Bíodh an-oiche agaibh. Ádh mór ó Sinéad Cholm Mharcuis.

  • Séamas Mac Coitir, Bearna.

    Treaslaím ó chroí le Mártan as an ngradan saoil a bheas le bronnadh air mar aitheantas as feabhas a shaothair. Is é rímháistir na hiriseoireachta é, tá a chuid Gaeilge gan cháim, agus gan aon agó, bhí sé os cionn a bhuille i gcónaí i réimse fhairsing na tráchtaireachta. Gura fada buan é! Níl aon cheardaí oilte nach bhfágann lorg a láimhe féin ar a shaothar.
    Go maire sé na blianta faoi mhaise agus faoi shláinte, agus go méadaí Dia i dtreise aigne é!

  • Aonghus

    Nár laga Dia MÓC, duine de ‘dhaoine córa’ na hÉireann!

  • Jamie Ó Tuama

    Tuillte go maith agat, a Mhártain. Comhghairdeas leat.

  • Máirín

    Is maith an aghaidh é ar fhear uasal!

  • Pádraig

    Beir bua is Beannacht a Mhártain!