‘God save the King’ nó Amhrán na bhFiann
Baineadh geit as imreoirí óga na hÉireann an tseachtain seo nuair a seinneadh amhrán náisiúnta na Breataine, ‘God Save the King’ in áit Amhrán na bhFiann, roimh chluiche cáilithe do chraobhchomórtais na hEorpa in éadan na Sualainne sa Bhulgáir.
Bhí foireann faoi 19 na mban ina seasamh gualainn ar ghualainn ag amharc ar bhrat na hÉireann agus ag dréim le hAmhrán na bhFiann a chluinstin fríd na callairí ach ina áit sin d’éist siad le thart ar ocht soicind de ‘God Save the King’.
Thosaigh lucht leanúna na hÉireann ag scairteadh agus ag feadaíl, bhí imreoirí na hÉireann rud beag fríd a chéile agus cuireadh stop tobann leis an cheol.
Tamall beag ina dhiaidh sin, thosaigh na himreoirí, na bainisteoirí agus lucht leanúna na hÉireann ag ceol Amhrán na bhFiann iad féin gan ceol ar bith sa chúlra.
Is cinnte gur thóg an teacht le chéile seo croíthe na n-imreoirí agus iad chóir a bheith réidh le dul i mbun coimhlinte in éadan na Sualainne, ach ar an drochuair ní bhfuair toradh rómhaith agus chaill siad an cluiche, 3-1.
Beidh mná na hÉireann ag súil le toradh níos fearr agus le cúnamh Dé, Amhrán na bhFiann a chluinstin nuair a rachaidh siad chun páirce in éadan na Polainne, ar an pháirc cheannann chéanna amárach.
A monumental start to the European U19 qualifiers in Bulgaria.
From that Anthem to No Anthem to We will do it ourselves so. pic.twitter.com/6uFDr6rOjP
— TOTAP Las Damas (@TOTAPLasDamas) November 26, 2025
Spota beag bídeach a thug laethanta móra chun cuimhne
An deireadh seachtaine seo a chuaigh thart cuireadh ar ceal cluiche leathcheannais peile Uladh ag leath ama idir An Bhoth agus CLG Sheáin Uí Laoghaire mar gheall ar an drochaimsir san Ómaigh.
Bhí CLG Sheáin Uí Laoghaire dhá phointe chun tosaigh ag an bhriseadh, ach cha raibh deis ag ceachtar den dá chumann an fheadóg dheireanach a chluistin ag Páirc Uí Éalaithe.
Ba é an réiteoir Joe McQuillan a bhí i mbun na feadóige don choimhlint ar an lá agus rinne sé cinneadh ag leath ama nach mbeadh an t-aicsean ag leanstan ar aghaidh mar gheall ar an aimsir agus na coinníollacha imeartha.
Craoladh an cluiche ar TG4 agus taispeánadh seat de McQuillan ag iarraidh an liathróid a phreabadh ar spota faoi leith i lár na páirce, ach char phreab sí mórán mar gheall ar an lábán agus an fliuchán.
Drochspota ar an pháirc do na himreoirí ar fad an oíche sin ach spota thar a bheith tábhachtach d’iarimreoir amháin de chuid Dhún na nGall agus Ghaoth Dobhair, Eamon McGee.
Thug an eachtra seo chun cuimhne an lá a bhuaigh McGee Craobh Shinsir Peile Uladh le Gaoth Dobhair den chéad uair riamh, nuair a fuair siad an ceann is fearr ar an Bhoth le pointe amháin, san Ómaigh in 2018.
Agus é ag fágáil trácht ar an ardán X, ar phictiúr den spota inar phreab McQuillan an liathróid an oíche cheana, dúirt sé gur bhuaigh an “spota beag” sin bonn Uladh dó agus go mbeadh sé “i gcónaí buíoch” den spota beag sin.
Spota amháin atá fágtha i gCluiche Ceannais Chraobh Shinsir Peile Uladh ag an phointe seo agus áit bainte amach ag fir Chill Chua ann cheana féin.
Rachaidh An Bhoth agus CLG Sheáin Uí Laoghaire chun páirce aríst ar an Domhnach beag seo ag Páirc Lúthchleasaíochta Ard Mhacha chun an spota deireanach a chinntiú.
Beidh an cluiche le feiceáil beo ar sheinnteoir TG4 ag 4pm.
Lá eile ag an bPaorach
Tagraíodh sa gcolún seo le gairid d’iarrachtaí an Déisigh, Séamus Power a áit ar an PGA Tour a chinntiú don bhliain seo chugainn.
I Georgia a bhí an comórtas deireanach den séasúr an tseachtain seo caite agus bhí ar an bPaorach a bheith sa gcéad trí áit má bhí sé chun a bheith áirithe sa gcéad 100 áit ar liosta FedEx agus lánstádas a fháil do 2026.
Rinne Power, a bhí ciaptha ag gortuithe le bliain anuas, a mhíle dícheall ach sa seachtú háit a chríochnaigh sé. Ba é an toradh ab fhearr a bhí aige i mbliana ach níor éirigh leis ach an 117ú áit a bhaint amach ar liosta FedEx.
Ní drochscéal amach is amach atá ann dó, áfach, agus stádas ‘coinníollach’ bainte amach aige a bhuí de chríochnú laistigh den chéad 125 áit. Fágann sé sin nach bhfuil Power cinnte d’áit i gcomórtais an PGA Tour gach seachtain agus go bhféadfaí go mbeidh air imirt sa Korn Ferry Tour, an comórtas atá céim níos ísle ná an PGA Tour, nó ar an DP World Tour ach fágann an críoch mhaith a chuir an Déiseach leis an séasúr go bhfuil deis níos fearr aige na comórtais mhóra a bhaint amach.
(Pádraic Ó Ciardha)
Fág freagra ar 'God save mná na hÉireann, an spota puitigh a shábháil Gaoth Dobhair agus lá eile ag an bPaorach'