Gan aon fhocal i nGaeilge nó faoin nGaeilge i gclár ‘Comóradh 1916’ Pháirtí an Lucht Oibre

Tá sé séanta ag Páirtí an Lucht Oibre gur i mBéarla amháin a bheas na himeachtaí atá beartaithe don bhliain seo chugainn ag an bpáirtí sin mar chomóradh 100 bliain ar Éirí Amach na Cásca 1916.

Ní luaitear aon imeachtaí trí Ghaeilge a bheith ar siúl nó ní dhéantar aon tagairt do ról lárnach na teanga sa tréimhse staire chinniúnach seo sa chlár oifgiúil a sheol an páirtí le linn na deireadh seachtaine. Ba i mBéarla amháin a foilsíodh an clár freisin.

Dúirt urlabhraí Pháirtí an Lucht Oibre le Tuairisc.ie gur ‘cáipéis bheo’ a bhí i gclár na n-imeachtaí agus go gcuirfí imeachtaí eile leis an gclár as seo go ceann bliana. Dúirt an t-urlabhraí go mbeadh fáilte á cur ag cathaoirleach an Chomórtha ag Páirtí an Lucht Oibre, an tAire Stáit Aodhán Ó Riordáin, roimh mholtaí ón bpobal agus ó bhaill Pháirtí an Lucht Oibre faoi imeachtaí ba cheart a chur leis an gclár.

Dúirt sé freisin go mbeadh deis ann ‘for the inclusion of Irish language elements’ i measc na na dtaispeántas, comórtais scoile, seimeanáir agus cruinnithe poiblí. Dhiúltaigh an t-urlabhraí glacadh leis gur imeachtaí trí Bhéarla amháin a bheadh i gceist.

“Nobody is for one moment suggesting that they are to be English-only events,” a dúirt sé le Tuairisc.ie