GAILEARAÍ: Radhairc áille agus dianchomórtas ag Déatlan Chonamara

Is é John Greaney as Gaillimh a bhuaigh Déatlan Chonamara ar an gCeathrú Rua.

B’é seo an dara bliain as a chéile ag Greaney, ó Team Hurt Locker, an bua a thabhairt leis, agus breis agus dhá nóiméad le spáráil aige.

Thosaigh an rás i sráidbhaile na Ceathrún Rua le rith 3.5km, agus tar éis cúrsa rothaíochta 21km a chríochnú, choinnigh Greaney greim ar an gcéad áit tar éis an dara rith de 3.5km. Is é Gavin Corey ó chlub tríatlan an Ómaigh i dTír Eoghain a bhí sa dara háit, agus Stephen Donnelly ón gclub áitiúil, TríSpórt, a bhí sa tríú háit.

Ba í Lorraine Carey ó chlub Liquid Motion ó Bhéal an Átha, Maigh Eo, an chéad bhean a chríochnaigh agus bearna shuntasach idir í féin agus Geraldine Gill agus Barbara Dunne a chríochnaigh sa dara agus sa tríú háit.

Ba é Ben Vahey, ó chlub Predator i mBaile Átha an Rí, Gaillimh an chéad lúthchleasaí sóisir a chríochnaigh agus bhí Rónán Ó Direáin as an Spidéal sna sála air.

“Bhí muid thar a bheith sásta leis an rás agus le caighdeán na hiomaíochta,” a deir an Rás-Stiúrthóir, Rónán Mac Con Iomaire. “Fágann an stádas ‘Sraith Náisiúnta’ a bhain Déatlan Chonamara amach dhá bhliain ó shin go bhfuil ardú suntasach tagtha ar chaighdeán na hiomaíochta, agus is iontach linn fáilte a chur roimh chuid de na luthchleasaithe déatlan is fearr sa tír chuig an Cheathrú Rua .”

Chláraigh beagán os cionn 60 luthchleasaí chun Déatlan Chonamara a dhéanamh, agus chríochnaigh 55 ar an lá.