FÍSEÁN: Gearrscannán nua le haisteoir as Conamara le taispeáint ag Fleadh Scannán na Gaillimhe

 Tá gearrscannán nua leis an aisteoir as Conamara Linda Bhreathnach, atá bunaithe ar ghearrscéal lena deirfiúr, Bridget Bhreathnach, le taispeáint den chéad uair an tseachtain seo chugainn.

Is é an t-aisteoir cáiliúil Patrick Bergin atá sa phríomhról i Native atá bunaithe ar ghearrscéal a foilsíodh ar an iris Comhar.

Gearrscannán gan focail atá i Native a bheidh le feiceáil in Amharclann na Cathrach, Gaillimh, ar an Aoine, an 14 Iúil, mar chuid den tsraith New Irish Shorts 4 ag Fleadh Scannán na Gaillimhe.

Scéal faoin “imirce agus an teacht abhaile” atá i Native, a deir Linda Bhreathanach ar éirigh lena céad gearrscannán, Adulting, duaiseanna idirnáisiúnta a bhaint amach.

“Baineann Native leis an gcumas atá ionainn mar dhaoine an ceann is fearr a fháil ar an uaigneas agus a theacht ar áilleacht an tsaoil,” a deir Linda Bhreathnach a chóirigh agus a stiúir Native.

Chaith an t-aisteoir agus scannánóir seachtain ag obair go deonach i gcampaí na dteifeach i dtuaisceart na Fraince agus chonaic sí go leor “cosúlachtaí”  idir scéal theifigh an lae inniu agus scéal mhuintir na hÉireann san am a chuaigh thart.

“Fágann an príomhcharachtar Conamara agus é ina imirceach eacnamaíochta. Nuair a thagann sé abhaile na blianta fada ina dhiaidh sin níl roimhe ach baile tréigthe. Bhí géarchéim dhomhanda na dteifeach agus na n-imirceach ar m’intinn agus an scannán seo á dhéanamh agam,” a deir Linda Bhreathnach.

Socraíodh gur scannán gan focail a bheadh ann mar go raibh sí “ag iarraidh scéal a insint a bheadh chuile dhuine in ann a thuiscint is cuma cén cúlra nó teanga a bheadh acu”. 

Comhléiriú le Marina Yournell Donahue as California is ea Native agus tá an bheirt bhan cheana féin ag obair i dteannta a chéile ar a gcéad scannán eile.

Tá Native bunaithe ar an ngearrscéal H91 Arís a scríobh a deirfiúr Bridget Bhreathnach, colúnaí le Tuairisc.ie, agus a foilsíodh ar Comhar i mí Lúnasa 2016.

I dteannta Patrick Bergin sa scannán nua, tá an t-aisteoir Colm Ó Mainnín arb as Ros Muc é. Seán T. Ó Meallaigh an stiúrthóir grianghrafadóireachta agus bhí Colm Hogan páirteach sa scannánú chomh maith.  Moisés Mas Garcia, cumadóir ceoil as an gCatalóin ó dhúchas, a chum an ceol nua don scannán.

Taispeánadh an chéad ghearrscannán a rinne Linda Bhreatnach, Adulting, ag féilte scannán ar fud an domhain agus thuill an saothar sin Gradam Rising Star di ó Irish Screen America.

Bhronn Irish Film London an Gradam don Ghearrscannán is Fearr ar Adulting ag an bhFéile Scannán Éireannach i Londain in 2016. 

– Tá Fleadh Scannán na Gaillimhe ar siúl ón 11 go dtí an 16 Iúil. Is féidir ticéad a fháil do Native anseo.