Tá aip “réabhlóideach” nua forbartha a aistreoidh caint an duine atá i mbun comhrá leat go dtí do rogha canúna Gaeilge.
‘An Cúntóir Canúintí’ atá ar an aip nua a bhaineann leas as an teicneolaíocht aitheanta gutha agus aistriúcháin chomhuainigh is déanaí.
Chun go n-aistreofaí a bhfuil á rá ag an té atá i mbun cainte leat go dtí canúint eile, ní gá ach péire cluasán a chur isteach, an aip a chur ar siúl ar d’fhón agus an chanúint is ansa leat a phiocadh ón roghchlár.
Má tá an té atá ag caint leat gar a dhóthain duit déanfar a chuid cainte a aistriú go dtí do rogha canúna ar an toirt.
Beifear ag moladh duit cead a fháil ón duine a bhfuil a chuid cainte á haistriú go canúint eile agat mar go bhféadfadh go mbeadh ceist ann faoi chúrsaí GDPR (Rialachán Ginearálta maidir le Cosaint Sonraí).
Comhfhiontar é ‘An Cúntóir Canúintí’ idir Foras na Gaeilge, Údarás na Gaeltachta agus Ollscoil na hÉireann, Gaillimh.
Dúirt an Dr John Walsh, an sochtheangeolaí aitheanta ó OÉ, Gaillimh, gur “áis réabhlóideach” a bhí san aip nua a d’athródh cúrsa na teanga.
“Nuair a bheidh stair na Gaeilge á scríobh amach anseo, aithneofar é seo mar cheann de na cora is cinniúnaí riamh i scéal na teanga. Is deacair cuimhneamh ar dhul chun cinn níos suntasaí i réimse an oideachais ná an aip seo agus táim cinnte go mbeidh múinteoirí, léachtóirí agus Oifigigh Pleanála Teanga ar bís chun úsáid a bhaint aisti.
“Ní bheidh ar chainteoirí dúchais canúintí nach dtaitníonn leo a fhulaingt a thuilleadh agus cuirfidh sí ar chumas nuachainteoirí neamhaird iomlán a dhéanamh ar na canúintí Gaeltachta,” arsa an Dr John Walsh.
Táthar ag súil go mbeidh an aip nua ar fáil ar na hardáin éagsúla roimh an 1 Aibreán 2022.
Sna trí mhórchanúint a bheidh ‘An Cúntóir Canúintí’ ar fáil ar dtús – Gaeilge na Mumhan, Gaeilge Uladh agus Gaeilge Chonnacht.
Bríd
Seo an saghas rud a thuilleann infheistíochta agus go mbainfear úsáide as…ní hamhlaidh agus do chur i gcéill leithéide an Pholasaí don Oideachas Gaeltachta nach bhfuil ach an teip i ndán dó…..cad é an costas go dáta do Pholasaí an chur i gcéill?
Donncha
‘cuirfidh sí ar chumas nuachainteoirí neamhaird iomlán a dhéanamh ar na canúintí Gaeltachta’
Ní maith sin
Breathnóir1
Caithfidh go bhfuil an aip iontach seo in úsáid ag lucht cónaithe Ros na Rún cheana féin, mar gurb í an t-aon áit sa tír ina dtuigeann mar shampla an Ciarraíoch an Conallach gan stró, agus a mhalairt :-)
Ciarán
Bhain mé triail as an leagan beta agus iontach ar fad! Mar shampla in ann Nuacht an Deiscirt ar RnaG a aistriú agus blas breá Conallach as! Bhí mé sna tríthi gáire!
An Fiach Liath
Cás go bhfuil bunachar sonraí cuimsitheach go leor acu cheanna féin an mbeadh aon tseans ann go bhforbróidís leagan Gaeilge de leithéidí “Dragon – Naturally Speaking” ag úsáid an chaighdeáin is déanaí gramadaí agus litriúcháin? Ba mhór an chabhair dúinne é nár chleacht ceachtar den dá chaighdeán nua!!!
Pól
Is scannal náisiúnta é nach bhfuil canúint Bhéal Feirste san áireamh
Muireann Ní Bheaglaoich
Dea-scéal ar an dea-shaol gan aon agó! Cabhróidh sé seo go mór liomsa sa seomra ranga – bíonn sé deacair ar fhoghlaimeoirí a bhfuil canúint na Mumhan acu canúint Uladh a thuigbheáil fá dtaobh de na fuaimeanna a bheith chomh cosúil le Gaidhlig na hAlban. Agus tagann sé an-chrua ar mhuintir Dhún na nGall ciall a bhaint as caint mhuintir Chonamara toisc go labhraíonn siad chomh sciobtha sin. Bíonn sé fuirist go maith an Ghaelainn a thuiscint agus is dóichí nach mbainfear úsáid as an aip go rómhinic do chanúint an Deiscirt. Tréalsaím le lucht forbartha na haipe – sárófar a lán deacrachtaí i ndáil le cúrsaí cumarsáide agus tuisceana sa seomra ranga, ní áirím ag Féile na nGael, an tOireachtas, mar a mbíonn barraíocht / an iomarca canúintí difriúla le cloisint. Dea-chomhartha do thodhchaí na Gaeilge agus do phobal na Gaeilge fré chéile👏👏
Pól Ó Braoin
Hí hí hí… ceann maith caithfidh mé a rá. Éad orm nárbh mé féin a smaoinigh ar an gceann sin ar dtús… :)
S. Mac Muirí
Tá sé ag gach aire rialtais ar a ghuthán le bliain anuas 7 ní fios an méid a chúnaigh /a chabhraigh/a chuidigh sé le costaisí aistriúcháin 7 míthuiscintí a laghdú.
Seanamadán
Foilsithe ar 1 Aibreán, muis… Tá sibh cruálach a leaids.