Faoi na polaiteoirí féin atá sé cinneadh a dhéanamh cur i gcoinne forbairtí sa Ghaeltacht – An tAire Tithíochta

Faoi Theachtaí Dála agus faoi Sheanadóirí iad féin atá sé cinneadh a dhéanamh cur i gcoinne forbairtí tithíochta sa Ghaeltacht, dar leis an Aire Tithíochta.

Ní raibh an tAire Darragh O’Brien sásta géilleadh go raibh “dualgas” ar pholaiteoirí cur i gcoinne forbairtí a mbeadh drochthionchar acu ar chúrsaí teanga i gceantair Ghaeltachta ach dúirt sé gur fúthu féin a bheadh sé cinneadh a dhéanamh.

Agus an tAire os comhair an chruinnithe is déanaí a bhí ag Coiste Oireachtais na Gaeilge, d’fhiafraigh an Seanadóir Lorraine Clifford-Lee de ar mheas sé go raibh dualgas ar chomhaltaí an choiste sin cur i gcoinne forbairtí tithíochta i limistéir Ghaeltachta, a dhéanfadh dochar don teanga.

“Is faoi choiste agus a chomhaltaí a bheadh sé má táthar ag iarraidh dearcadh a nochtadh faoi rud ar bith, más i bhfabhar nó i gcoinne atáthar. Tá saoránach ar bith den stát in ann tuairim a thabhairt ar iarratas pleanála,” a dúirt an tAire O’Brien.

“Is faoi Theachtaí agus Seanadóirí a n-intinn féin a dhéanamh suas maidir le haon aighneachtaí atá siad ag iarraidh a dhéanamh ar aon iarratas pleanála in aon áit sa tír.”

Bhí conspóid ann i bhfómhar na bliana seo caite nuair a tháinig sé chun solais go raibh aighneacht déanta ag an Seanadóir Clifford-Lee in aghaidh eastát tithíochta nua i nGaeltacht Phort Láirge, cé nach raibh cónaí uirthi féin sa cheantar. 

Dúirt an Taoiseach Micheál Martin ag an am go raibh seisean i gcoinne polaiteoirí a bheith ag cur in aghaidh forbairtí tithíochta “go ginearálta” mar go raibh géarchéim tithíochta ann. Dúirt sé nach raibh dóthain sonraí aige chun breithiúnas a thabhairt faoin gcás sa Rinn.

Dúirt an tAire O’Brien, atá sa toghcheantar céanna le Clifford-Lee i Fine Gall, nach raibh dóthain eolais ar an gcás sin aige féin ach gur thuig sé an tábhacht a bhain le cosaint a thabhairt don Ghaeilge sa chóras pleanála.

Chuir an Seanadóir Clifford-Lee fáilte roimh chinneadh Chomhairle Cathrach agus Contae Phort Láirge gan cead pleanála a thabhairt chun 46 teach nua a thógáil ar shuíomh i Maoil an Choirnigh i gceartlár na Rinne.

Dúirt an Seanadóir nach gcuireann sí in aghaidh forbairtí tithíochta riamh ach gur cás speisialta a bhí ann mar gheall ar an tionchar a bheadh ag an bhforbairt ar chúrsaí teanga.

Rinne an dream a chuir isteach ar an gcead pleanála don eastát sa Rinn, Shinebright Limited, achomharc ar chinneadh na Comhairle agus tá cinneadh le fógairt go luath ag An Bord Pleanála faoin chás.