Beidh deontais idir €500 agus €2,500 ar fáil d’eagrais agus do ghrúpaí i mbun imeachtaí agus feachtas pobail i rith Sheachtain na Gaeilge, a bhuíochas le €40,000 a bhronn Fondúireacht Phobail na hÉireann ar Chonradh na Gaeilge inné.
Glacfar le hiarratais ar dheontas ó Chiste Tacaíochta Sheachtain na Gaeilge 2016 ar 11 Eanáir 2016 agus beidh ocht lá déag ag eagrais agus grúpaí cur isteach air agus cuirfear an t-airgead ar fáil do na hiarratais rathúla faoi lár mhí Feabhra. Bíonn Seachtain na Gaeilge ar siúl idir 1-17 Márta.
Déanfar measúnú ar na hiarratais ar na deontais bunaithe ar an bplean don imeacht nó feachtas, an taithí atá ag lucht a eagraithe, an chaoi a gcuirfidh siad an Ghaeilge chun cinn agus ar na naisc a bheidh acu le cúrsaí cultúir agus staire, ag cur san áireamh Comóradh an Chéid, 1916.
Tá Seachtain na Gaeilge ag iarraidh ar ghrúpaí a bhfuil spéis acu sa chiste tacaíochta tús a chur leis an bpleanáil d’imeachtaí agus feachtais ‘spleodracha nua’ anois.
Dúirt Brenda Ní Ghairbhí, Bainisteoir Sheachtain na Gaeilge, go gcuirfidh an ciste tacaíochta go mór leis na himeachtaí a bheidh á reáchtáil i rith Sheachtain na Gaeilge.
“Is céim mhór chun tosaigh do Sheachtain na Gaeilge é an maoiniú seo agus táimid fíorbhuíoch d’Fhondúireacht Phobail na hÉireann as. Cuirfidh an ciste tacaíochta go mór le réimse agus le caighdeán na n-imeachtaí agus na bhfeachtais pobail a bheidh ar siúl do Sheachtain na Gaeilge 2016 trí thacaíocht luachmhar a chur ar fáil do ghrúpaí a bheidh rannpháirteach san fhéile an bhliain seo chugainn,” a dúirt sí.
Idir an dá linn, tá sé fógartha ag lucht eagraithe Sheachtain na Gaeilge gurb iad baill an bhanna ceoil Gaelach, Seo Linn, a bheidh ina n-ambasadóirí do Sheachtain na Gaeilge 2016. Cuireadh giolc amach ó chuntas na féile le linn do Sheo Linn a bheith ag casadh ceoil ar an Late Late Show oíche Dé hAoine inar fógraíodh an ceapachán.
@SeoLinn go hiontach ar @RTELateLateShow táimid an-sásta go mbeidh siad ina n-ambasadóirí do #SnaG16 #chualasibhanseoéardtús #NollaigShona
— Seachtain na Gaeilge (@SnaGaeilge) December 18, 2015
Dúirt Urlabhraí de chuid Sheachtain na Gaeilge, gur roghnaíodh an banna ceoil mar ambasadóirí don bhliain seo chugainn mar gheall ar an dea-shampla atá tugtha acu don aos óg faoin nGaeilge.
“Tá Seo Linn ag déanamh go leor chun an Ghaeilge a chur chun cinn agus tá gach duine sa bhanna ceoil an-tógtha leis an nGaeilge. Tá siad á cur chun cinn ar bhealach nua-aimseartha agus spraíúil agus luíonn sé sin le bunaidhmeanna Sheachtain na Gaeilge.
“Anuas air sin, tá siad ag obair go lán-aimseartha anois mar bhanna ceoil Gaeilge agus is iontach an sampla é sin do dhaltaí scoile na tíre. Tá siad ag baint slí bheatha as an nGaeilge agus ag léiriú go bhfuil deiseanna ann do chainteoirí Gaeilge,” a dúirt sé
Beidh Seo Linn ag tacú le mórimeacht Sheachtain na Gaeilge ‘Féile na Físe’ ar an 15 Márta a dhéanfaidh ról na Gaeilge agus cultúir na hÉireann i 1916 a chomóradh agus an chaoi ar chuimsigh an fhís a bhí ag ceannairí an Éirí Amach d’Éirinn an dá rud. Tá leagan nua den amhrán clúiteach a chum an Piarsach agus a chanadh na hÓglaigh le linn Éirí Amach na Cásca agus Chogadh na Saoirse, ‘Oró ‘Sé Do Bheatha Abhaile’, agus é taifeadta ag Seo Linn. Cuirfear amach é mar chuid den imeacht sin.
Fág freagra ar '€40,000 curtha ar fáil d’imeachtaí Sheachtain na Gaeilge 2016 agus Seo Linn fógartha mar ambasadóirí na féile'