Diúltaithe ag Johnson gealltanas a thabhairt do Martin nach gcuirfear an Prótacal ar ceal go haontaobhach

Bhí comhrá fóin ag an mbeirt cheannairí inniu inar aontaigh siad go raibh sé ríthábhachtach go gcuirfí feidhmeannas Stormont ar bun arís a luaithe agus ab fhéidir

Diúltaithe ag Johnson gealltanas a thabhairt do Martin nach gcuirfear an Prótacal ar ceal go haontaobhach

Tá diúltaithe ag Príomh-Aire na Breataine Boris Johnson gealltanas a thabhairt don Taoiseach Micheál Martin nach ndéanfaidh Rialtas na Breataine cinneadh aontaobhach an Prótacal iarBhreatimeachta a chur ar ceal.

Bhí comhrá fóin ag an mbeirt cheannairí inniu inar aontaigh siad go raibh sé ríthábhachtach go gcuirfí feidhmeannas Stormont ar bun arís a luaithe agus ab fhéidir.

I ráiteas a chuir Oifig na Taoisigh amach faoin gcomhrá, dúirt sé gur leag Micheál Martin béim ar an tábhacht a bhain leis na cainteanna idir an Bhreatain agus an tAE agus ar an ngá le cinntí aontaobhacha a sheachaint.

Ach sa ráiteas a chuir Rialtas na Breataine amach i ndiaidh an chomhrá, níor cuireadh cinneadh aontaobhach i leith an Phrótacail as an áireamh.

Dúradh go raibh scéal an Phrótacail ag éirí “an-tromchúiseach”, go raibh dochar á dhéanamh do Chomhaontú Aoine an Chéasta agus gur léirigh toghchán Stormont nach bhféadfaí an Prótacal a fhágáil mar atá. 

Mhaígh Johnson nach raibh an méid ba ghá déanta ag an gCoimisiún Eorpach chun dul i ngleic leis na fadhbanna eacnamaíochta agus polaitiúla a bhí, dar leis, á gcruthú ag an bPrótacal.

Dúradh go ndúirt Johnson leis an Taoiseach go ndéanfadh Rialtas na Ríochta Aontaithe gníomh chun an tsíocháin agus an tseasmhacht pholaitiúil a chosaint i dTuaisceart Éireann “sa chás nach bhféadfaí teacht ar réiteach”. 

Tuairiscíodh ar maidin go raibh Rialtas na Breataine ar tí a fhógairt go ndéanfaí gníomh aontaobhach i leith an Phrótacail trí reachtaíocht a thabhairt isteach a cuireadh go leor de ar ceal. 

De réir na dtuairiscí, gheobhadh Rialtas na Breataine réidh go haontaobhach leis na seiceálacha ar earraí á seoltar as an mBreatain go dtí Tuaisceart. 

Cheadódh an reachtaíocht chomh maith do lucht gnó sa Tuaisceart neamhaird a dhéanamh ar rialacha an AE agus bhainfeadh sí de Chúirt Bhreithiúnais na hEorpa an t-údarás rialú faoi cheisteanna a bhaineann leis an Tuaisceart.

Ní raibh aon tagairt shonrach in Óráid na Banríona in Westminster inniu don reachtaíocht i dtaobh an Phrótacail atá dreáchtaithe ag Rialtas na Breataine ach bhí sé le tuiscint gur ag tagairt don dréachtreachtaíocht sin a bhíothas i gcuid áirithe den óráid ina leagtar amach clár reachtaíochta an Rialtais.

Dúirt Prionsa Charles na Breataine Bige, a thug an óráid thar cheann a mháthar go raibh “rath agus sláine” na Ríochta Aontaithe ar fad “fíorthábhachtach”, ag áireamh “na ceangail eacnamaíochta inmheánacha idir na codanna go léir di [an Ríocht Aontaithe]”.

Fág freagra ar 'Diúltaithe ag Johnson gealltanas a thabhairt do Martin nach gcuirfear an Prótacal ar ceal go haontaobhach'