Dhá leabhar álainn Gaeilge do pháistí – leabhairín an-spraíúil faoi bhearradh gruaige agus leabhar álainn amhrán

Bearradh Gruaige d’Eoinín

Is é Bearradh Gruaige d’Eoinín an ceathrú heagrán sa tsraith leabhar cairtchláir seo do pháistí óga. Is í Muireann Ní Chíobháin a scríobh, tá siad maisithe ag Róisín Hahessy agus foilsithe ag Futa Fata. Leabhairíní beaga deasa iad atá feiliúnach le léamh amach do pháistí óga idir 3 -7 mbliana d’aois.

Baintear úsáid chliste as raon teoranta dathanna sna leabhair, gorm, bán, glas, buí agus a leithéid. Dathanna iad a bheadh ina mboiscín crián ag an gcuid is mó de pháistí dá mbeadh fonn orthu a bheith ag tarraingt a bpictiúirí féin théis dóibh na leabhair a léamh.

Is carachtar álainn, gealgháireach é an t-uainín Eoinín, príomhcharachtar na leabhar seo, agus é i mbun eachtraí a mbeidh tuiscint ag páistí óga orthu.

San eagrán is deireanaí, tá sé in am ag Eoinín bearradh gruaige a fháil ach ní róshásta atá sé faoi sin. Cuireann léaráidí spraíúla Hahessy go mór leis an insint, feictear pictiúr d’Eoinín agus mullach mór gruaige (nó olann) air. Ní hamháin go bhfuil sé in am aige bearradh gruaige a fháil, ach tá sí fásta chomh fada sin nach féidir éadan Eoinín a fheiceáil.

Baineann Ní Chíobháin úsáid as abairtí beaga gonta a ghluaiseann an scéal ar aghaidh go deas is atá éasca ag páistí a thuiscint. Tugtar spás do na léaráidí chun an scéal a insint freisin agus deis ag an léitheoir óg an scéal a chur le chéile ó na pictiúir. Tá gné idirghníomhach sa téacs ag tús an leabhair.

‘Cá bhfuil Eoinín inniu?

An bhfeiceann tusa Eoinín?’

Níl aon amharc ar Eoinín, áfach. An néal nó clabhta atá ann? Ní hea. Iompaigh an leathanach agus feictear Eoinín agus éiníní beaga ag eitilt timpeall ar a chloigeann.

‘Ansin atá sé!

Tá a chuid gruaige cosúil le nead éin!

Teastaíonn bearradh gruaige uaidh.’

Leabhairín an-spraíúil a mbainfidh páistí spraoi agus spórt as. Ní hamháin sin ach b’fhéidir go dtabharfadh sé misneach don pháiste beag a mbeadh faitíos orthu a ghabháil go dtí an bearbóir nó an gruagaire.

Ceol na Mara

Leabhar amhrán do pháistí é Ceol na Mara agus é maisithe go hálainn. Scríofa ag Tadhg Mac Dhonnagáin, tá fiche amhrán samhlaíocha san áireamh ann a dhéanann ceiliúradh ar ghnéithe éagsúla den saol cois fharraige. Gheobhaidh tú idir amhráin spraíúla, croíúla agus barrúla sa gcnuasach seo.

John Ryan a chum an ceol atá ag dul leis na hamhráin is tá beocht sa mbreis curtha le gach amhrán sa leabhar ag na pictiúir áille atá déanta ag Tarsila Krüse agus Úna Woods. Féirín don tsúil chomh maith leis an gcluas atá sa leabhar idir na pictiúir agus na hamhráin. Cuireann an dá stíl ealaíne go mór leis an leabhar agus tá sé spéisiúil cur chuige éagsúil na n-ealaíontóirí a fheiceáil.

Gné speisialta de Ceol na Mara ná gur leabhar ilmheán é. Is féidir éisteacht leis na hamhráin ar fad ach an cód QR atá i gcló ar chlúdach an leabhair a scanadh.

Tugann an leabhar ardú croí don léitheoir idir liricí na n-amhrán agus na pictiúir. Tá ceiliúradh ann ar ghnéithe den saol atá simplí is a mbeidh bá ag daoine óga leo, rudaí ar nós a bheith ag tógáil caisleáin nó ag crochadh sliogán suas le do chluas ag iarraidh an fharraige a chloisteáil.

Seans go n-aithneoidh páistí cuid de na hamhráin mar tá siad ar fáil ar dhlúthdhiosca cheana. Rinneadh meascadh nua ar na traiceanna don eagrán nua seo. Tarraingíonn na hamhráin aird ar an draíocht atá le fáil sa domhan mórthimpeall orainn agus sa ghnáthshaol laethúil ach na súile a oscailt agus aird a thabhairt ar a bhfuil inár ngaobhar.

Baintear úsáid as stíleanna éagsúla ceoil sna hamhráin idir an ceol tíre, na bailéid shéimhe agus traiceanna sciobtha. Is iad Tadhg Mac Dhonnagáin, Caitlín Ní Chualáin agus páistí scoile as Scoil Sailearna, Indreabhán i gConamara a chuireann na hamhráin i láthair.

Tá soineantacht, áilleacht is uaisleacht ag baint leis an mbailiúchán idir ghlórtha Chaitlín, Thaidhg agus na ngasúr, an Ghaeilge shaibhir agus téamaí na n-amhrán féin. Tá neart gáire is spraoi le fáil sna hamhráin freisin, éist le ‘Cé a Chlúdaigh Mé le Gaineamh?’. Bainfidh páistí agus teaghlaigh an-spraoi as an leabhar ilmheán seo agus is ceann é a mbeifear ag filleadh air arís is arís eile.