Dathanna an chontae curtha i leataobh agus dathanna an chlub ar foluain

Bhí ‘scoth is plúr’ imreoirí CLG san ardchathair aréir agus na gradaim á mbronnadh ar na réalta nua. Dar ndóigh bíonn argóintí i gcónaí faoi dhéantús na foirne agus b’amhlaidh scéal i mbliana. É sin ráite is dóigh go mbeadh formhór sásta go leor leis an fhoireann a piocadh. Cheapas féin go mbeadh Adam English Luimnigh roghnaithe agus is dócha gur féidir cás a dhéanamh do Darragh McCarthy Thiobraid Árann freisin.

Ar na páirceanna éagsúla i gCúige Laighean a bheidh ár n-aird an deireadh seachtaine seo nuair a imreofar ceithre chluiche i gCraobh Shinsir Chlubanna AIB. Tá Naomh Máirtín as Loch Garman in aghaidh Na Fianna as Baile Átha Cliath, beidh Raonaithe Stua Laighean ó Cheatharlach (seaimpíní an chúige in 2013) ag tabhairt aghaidh ar Nás Chill Dara, tabharfaidh An Chloch-Baile Cholla ó Laois aghaidh ar Bhaile Chaisleáin Mhic Eochagáin na hIarmhí, agus beidh Seamróga Bhaile Héil as Cill Chainnigh ag imirt in aghaidh Chill Chormaic-Cill Achaidh as Uíbh Fhailí.

Is é seo an t-am den bhliain ina mbíonn an bród a bhíonn ag daoine as an gclub níos láidre ná aon rud eile. Cuirtear dathanna an chontae i leataobh agus bíonn dathanna an chlub ar foluain agus gan puinn talaimh á ghéilleadh.

Le deich mbliana anuas, bhí dath dubh is ómra ar theideal Laighean beagnach i gcónaí. Bhuaigh na Seamróga ceithre cinn de na teidil sin. Mar sin féin, bhí athrú mór anuraidh ann. In 2024, bhain Na Fianna ó Bhaile Átha Cliath an choróin den chéad uair riamh — éacht stairiúil a léirigh cé chomh fada is atá iománaíocht na príomhchathrach tagtha.

Bhí Gaeil Uí Lochlainn ó Chill Chainnigh i gceannas in 2023, agus roimhe sin bhain Baile Héil an gradam in 2021 agus 2022. Thar na blianta sin, chonaiceamar buaiteoirí as Cill Chainnigh agus Uíbh Fhailí ag coimeád an traidisiún beo, ach is soiléir nach raibh an comórtas riamh chomh cothrom nó chomh teasaí.

Tá na curaidh ar ais lena gcreach a chosaint. Tiocfaidh Na Fianna agus iad lán muiníne, a gcuid iománaíochta géar agus a dtacaíocht láidir óna mbua stairiúil anuraidh. Tá Naomh Máirtín féin saibhir ó thaobh traidisiún iomána, meascán deas d’imreoirí óga is seanfhondúirí catha acu. Má éiríonn leo na cathanna lár páirce a bhuachan go luath agus líon na saorphocanna a ísliú, cuirfidh siad brú ar chleas na hardchathrach. Ach má fhaigheann Na Fianna cead a gcos agus má úsáideann siad an spás go cliste, beidh sé deacair iad a stopadh. Agus dar ndóigh, tá taithí agus muinín 2024 acu.

Raonaithe Stua Laighean v Nás na Rí
Is dócha gurb é seo an cath is cothroime a imreofar. Tugann imreoirí Cheatharlach taithí, neart agus eagar leo, tuigeann siad an caighdeán atá de dhíth i Laighin. Tagann Nás agus gan mórán brú orthu, ach tá siad ag tógáil ar bhonn daingean le blianta beaga anuas. Beidh an bua ag brath ar chruas agus ar chrógacht. Má éiríonn le Nás déine Cheatharlach a mheaitseáil, b’fhéidir go mbeadh toradh suimiúil againn.

An Chloch Baile Cholla v Baile Chaisleán na nGeochagán

Dhá chlub bhródúla ó dhá chontae a bhfuil croí an chluiche iontu cé nach mbíonn siad ag imirt ar ardchaighdeán go rialta. Tá An Chloch Baile Cholla i gcroílár iománaíochta Laoise. Tiocfaidh Baile Chaisleán na nGeochagán agus iad lán le misneach agus an tuiscint acu go bhfuil gach seans acu buachaint.

Is minic a spreagann ardán Laighean foirne ó chontaetha beaga chun gaiscí. Is dócha gur cluiche dlúth, íseal-scórála a bheidh ann, áit a mbeidh an chéad smachtú cruinn agus gach poc saor tábhachtach. An fhoireann is díograisí agus is cruinne leis an liathróid is aici a bheidh an lámh in uachtar.

Seamróga Bhaile Héil v Cill Chormaic-Cill Achaidh
Seo an príomhchluiche is dócha. Is iad Baile Héil uaisle na hiománaíochta club, curaidh Laighean agus na hÉireann arís is arís eile, le buíon imreoirí ina lár nach bhfuil aon rud nach bhfuil feicthe acu. Ach ní bheidh faitíos ar Chill Chormaic-Cill Achaidh.

Tabharfaidh siad leo inniu bród Uíbh Fhailí chomh maith lena dtaithí óna n-aimsir féin ag an ardleibhéal. Má fhaigheann na Seamróga cúil go luath sa chluiche seo, d’fhéadfadh an cluiche éirí fadálach don chuairteoir. Ach má éiríonn le Cill Achaidh a rás a bhriseadh, cúpla scór a fháil agus iallach a chur ar Baile Héil oibriú níos crua ná mar is gnách, b’fhéidir go mbeadh fíorchluiche againn agus bheadh sé an-deacair a rá nach mbeadh an bua ag na Seamróga.

Ó Pháirc Loch Garman go Páirc Uí Nualláin, inseoidh an Domhnach seo go leor dúinn faoin gcumhacht sa gcúíge faoi láthair. Tá clubanna Chill Chainnigh fós thar a bheith láidir, ach tá ardú Bhaile Átha Cliath, seasmhacht Cheatharlach, agus dúil Laoise, Uíbh Fhailí agus na hIarmhí ag tabhairt fuinneamh úr don chomórtas.