Cumainn CLG Ghaeltachta le feiceáil i sraith nua TG4

Tabharfaidh Ár gClub, sraith nua seacht gclár ó TG4, léargas ar na pobail agus ar na heachtraí a thit amach i gceithre chumann difriúil, Cumann Caide na Gaeltachta, na Piarsaigh, Na Dúnaibh agus Crócaigh Chill Mochuda

Cumainn CLG Ghaeltachta le feiceáil i sraith nua TG4

Pictiúr: INPHO/Donall Farmer

Beidh trí chumann Gaeltachta faoi chaibidil i sraith nua TG4, Ár gClub, a gcuirfear tús léi an tseachtain seo chugainn.

Tugann an tsraith, a sheol an láithreoir aitheanta spóirt, Evanne Ní Chuilinn, i mBaile Átha Cliath aréir, léargas ar na pobail agus ar na heachtraí a thiteann amach i gceithre chumann éagsúla CLG le linn na bliana 2018.

Is iad na cumainn a bheidh le feiceáil in Ár gClub ná Cumann Caide na Gaeltachta as Corca Dhuibhne, na Piarsaigh as Ros Muc i nGaeltacht Chonamara, na Dúnaibh as Gaeltacht Thír Chonaill agus cumann as Baile Átha Cliath, Crócaigh Chill Mochuda.

Seacht gclár san iomlán atá i gceist sa tsraith nua atá déanta ag an gcomhlacht léiriúcháin Aniar do TG4 agus drinneadh an taifeadadh don tsraith i gcaitheamh na bliana seo caite.

Tabharfaidh na cláir léargas ar bhliain eachtrúil na gcumann uile in 2018, idir fheachtas na Gaeltachta agus iad ar ais i gCraobh Shinsir Peile Chiarraí, dhúshlán na nDúnaibh agus iad ag fáil réidh do Chomórtas Peile na Gaeltachta, iarracht Chill Mochuda Craobh Shinsir Iomána Átha Cliath a bhaint agus dheacrachtaí na bPiarsach mar chumann tuaithe foirne a chur chun páirce.

Craolfar an chéad chlár den tsraith Déardaoin seo chugainn, an 7 Feabhra, ag 8.00pm.

Alan Esslemont (TG4), Sinéad Ní Shúilleabháin (Na Piarsaigh), Evanne Ní Chuilinn, Aisling Whitely (Cill Mochuda – Na Crócaigh), Seán Ó Cualáin (Aniar), Richie O’Donnell (Aniar)

Léigh tuilleadh sa rannóg seo 'Cultúr'

Fág freagra ar 'Cumainn CLG Ghaeltachta le feiceáil i sraith nua TG4'

I mBéal an Phobail