Ní fada anois go mbeidh cultúrlann nua €2 milliún ag Gaeil Ard Mhacha agus an obair nach mór críochnaithe ar fhorbairt Aonach Mhacha.
Léiríonn na pictiúrí is déanaí den lárionad siamsaíochta, cultúir agus ealaíne an dul chun cinn mór atá déanta ar an togra ó cuireadh tús le tógáil an ionaid i Meán Fómhair na bliana seo caite.
Tá na fuinneoga in áit agus an obair ar lean ag suíomh ár gcultúrlainne úire in Ard Mhacha. pic.twitter.com/zferISrCpm
— Aonach Mhacha (@AMhacha) 20 Meitheamh 2019
Beidh siopa agus caifé san ionad nua, chomh maith le spás le haghaidh coirmeacha ceoil, drámaí, imeachtaí sóisialta, aclaíochta, teaghlaigh agus óige.
I measc na n-áiseanna eile atá á lua leis an fhoirgneamh, tá oifigí d’eagraíochtaí Gaeilge, seomraí ranga, gailearaí, stiúideo ilmheán agus spás ceardlainne.
‘Aonach Mhacha’ a bheas á thabhairt ar an Ghaelionad nua, atá á thógáil ar an suíomh mar a mbíodh an seanstáisiún dóiteáin tráth.
Dúirt Seán Ó Maoilsté, stiúrthóir Aonach Mhacha, le Tuairisc.ie cheana go mbeadh Aonach Mhacha “mar fhógra agus mar ráiteas muiníne” i dtaca leis an bhorradh atá tagtha faoin Ghaeilge sa chathair.
Breathnóir1
Scéala iontach – fair plé do mhuintir Ard Mhacha.
Nár bhreá an rud é a leithéid a bheith le fáil i ngach baile mór agus i ngach cathair fud fad na hÉireann?
Mac an Mheiriceánaigh
Cé atá ag íoc as? Muintir an chontae féin? Is trua nach bhfuil muintir na Gaillimhe chomh mórchruíoch céanna