Cúige Chonnacht ag súil le toradh níos fearr i mbliana

Beidh Cúige Chonnacht ag tabhairt faoi na hUltaigh ar an mBóthar Beag inniu agus iad ag iarraidh dearmad a dhéanamh ar an  ngreadadh 35-3 a fuair siad an t-am seo anuraidh. Is i mBéal Feirste a bhí an cluiche sin ar siúl agus ach an oiread leis na Muimhnigh tá na Connachtaigh ag imirt i bhfad níos fearr faoi láthair ná mar a bhí siad anuraidh. Níl sé éasca toradh an chluiche seo a thuar, cé gur fiú a mheabhrú go bhfuil buntáiste trí nó sé phointe ag baint le himirt sa mbaile. Beidh le feiceáil an mbeidh foireann na Gaillimhe in ann aon leas a bhaint as sin, ach bí ag súil le sárchluiche mar a bhíonn go hiondúil idir na foirne seo.

Bhí  neart éiginnteachta ag baint le himirt an chluiche seo.  Bhí agus tá go leor daoine fós den bharúil gur cheart é a chur ar athlá de bharr na dianghlasála i dTuaisceart Éireann.  Ach chinn foireann bainistíochta an Pro 14 nach raibh aon bhaol go scaipfí Covid dá n-imreofaí é. B’fhéidir go bhfuil an ceart acu ach is cinnte nach bhfuil an cinneadh ag teacht le sprid na rialacha.

Roimh theacht an Covid-19 ní bhíodh sé éasca ariamh teacht ar thicéad do na cluichí idirchúige a bhíodh á n-imirt thar thréimhse na Nollag agus na hathbhliana. Go deimhin, is minic gurb iad na cluichí sin an teacht isteach airgid is mó a bhíodh ag leithéidí chúigí Chonnacht agus Uladh.  Níl stró ar bith maidir le ticéid i mbliana ámh mar nach bhfuil cead freastal ar na cluichí sna sé chontae fichead agus tá éiginnteacht faoi láthair faoin gcluiche a bheas á imirt i mBéal Feirste ar an dara lá de mhí Eanáir.

Tá an cluiche idir Cúige Mumhan agus Cúige Laighean a bhí le himirt ar fhód Thuamhan tráthnóna inniu curtha ar athló toisc go raibh lucht champa Chúige Laighean ag fanacht ar thorthaí tástálacha don ghalar.