‘Creidimse go n-éireoidh linn’ a deir Holohan agus 1,269 cás nua fógartha

Tá 1,269 cás nua den choróinvíreas fógartha ag an Roinn Sláinte tráthnóna.

13 duine eile atá básaithe de dheasca an ghalair.

Bhí 221 de chásanna an lae inniu i gcontae na Mí, níos mó ná mar a bhí in aon chontae eile.

116 cás nua a bhí i gCorcaigh agus 74 cás nua a bhí i nGaillimh. 28 cás nua a bhí i gCiarraí, 28 cás eile a bhí i Maigh Eo, 22 cás a bhí i bPort Láirge agus 21 cás a bhí i nDún na nGall.

203 cás nua a bhí i mBaile Átha Cliath.

Tá 312 duine a bhfuil an Covid-19 orthu sna hospidéil agus tá 34 duine díobh in aonad dianchúraim.

279.3 in aghaidh gach 100,000 duine ráta an ghalair sa phobal. 590.6 an ráta anois i gcontae na Mí, ardú 100 ón lá inné.

328.5 atá i nDún na nGall agus 322 atá i gCorcaigh. 313.9 an ráta i nGaillimh agus 247.8 an ráta in aghaidh gach 100,000 duine i gCiarraí. 183.9 an ráta i Maigh Eo agus 154.9 atá i bPort Láirge.

Dúirt Príomhoifigeach Leighis na Roinne Sláinte, an Dr Tony Holohan, gur dóigh leis go n-éireoidh leis na srianta nua Leibhéal 5 a bheidh i bhfeidhm go ceann sé seachtaine.

“Creidimid go bhfuil ar ár gcumas é seo a dhéanamh… Creidimid gur féidir linn an galar a thabhairt anuas go dtí an leibhéal ag a raibh sé nuair a bhuail an chéad ráig an tír agus é a choinneáil faoi smacht ansin.

“Is é an cúram atá orainne i NPHET monatóireacht a dhéanamh ar an ngalar… má théimid ar strae, caithfimid athmhachnamh a dhéanamh. Ach creidimse go n-éireoidh linn,” a deir an an Dr Tony Holohan.

Dúirt sé go raibh “roinnt cinntí móra déanta ag an Rialtas le laethanta beaga anuas” ach “gur faoi gach duine againn sa bpobal atá sé anois gach ar féidir linn a dhéanamh”.

“An teachtaireacht is tábhachtaí atá againn don phobal ar fad, aon duine agaibh a bhfuil aon chomharthaí sóirt den Covid-19 oraibh – caithfidh sibh fanacht amach ó gach duine eile, féinleithlisiú a dhéanamh,” arsa an Dr Holohan.  

Dúirt sé go rabhthas ag súil go mbeadh níos lú ná 100 cás sa lá sa tír faoi thús mhí na Nollag nuair a scaoilfear srianta leibhéal a 5.

Dúirt an Dr Holohan go bhféadfaí na srianta a scaoileadh dá n-éireodh linn ráta scaipthe an ghalair nó an uimhir R a ísliú faoi 0.5.

Dúirt an Taoiseach Micheál Martin gur “dúshlánach go maith” a bheadh sé an ráta sin a bhaint amach i sé seachtaine. Dúirt an Taoiseach gurb é is dóichí go mbeadh an Rialtas ag déileáil leis an Covid-19 ar feadh dhá mhí dhéag eile.

Agus an Taoiseach ag caint sa Dáil, dúirt sé gur dócha go mbeimis ag dul ó shrianta diana go srianta níos boige cúpla uair sna míonna atá amach romhainn.

Dúirt sé nach bhféadfadh an tír seo an Covid-19 a ghlanadh go hiomlán as an tír mar nach bhféadfaí an teorainn sa tír a dhúnadh.

Tabharfar cumhachtaí breise don Gharda Síochána le go bhféadfar fíneáil a ghearradh ar dhaoine a eagraíonn cóisirí tí.

Chinn an Rialtas inniu go mbeadh cead ag Gardaí fíneáil a ghearradh ar aon duine a dhiúltaíonn deireadh a chur le cóisir ina dteach ach níl aon chumhacht ag Gardaí dul isteach sa teach sin chun an chóisir a stopadh.

Tá fíneálacha nua á bplé do dhaoine a dhiúltaíonn cloí leis na srianta nua taistil a thiocfaidh i bhfeidhm Déardaoin. Táthar á mholadh go ngearrfaí fíneáil €60 ar dhuine a sháraíonn na srianta taistil 5 chiliméadar.

Sa tréimhse dheiridh dianghlasála bhí cead an dlí a chur ar dhaoine a sháraigh na srianta taistil agus pionós 6 mhí príosúin nó fíneáil €2,500 i bhfeidhm.

Faoin gcóras nua, is pionós socraithe a bheidh i gceist, mar atá ann i gcás sárú teorainneacha luais, agus an té nach n-íocfadh an fhíneáil, chuirfí fíneáil níos troime air nó thabharfaí os comhair na cúirte é.

Tá a leithéid d’fhíneáil á phlé i gcás daoine nach gcaitheann masc aghaidhe in áiteanna poiblí, amhail siopaí agus an córas iompar poiblí.

Níos luaithe tráthnóna, d’fhógair Roinn Sláinte an Tuaiscirt go raibh 913 cás nua deimhnithe acu agus go raibh triúr eile tar éis bháis de dheasca an Covid-19.

Tá 286 duine a bhfuil an Covid-19 orthu sna hospidéil ó thuaidh den teorainn agus tá 29 duine díobh in aonad dianchúraim.

81,209 cás den ghalar atá deimhnithe in Éirinn go nuige seo, 28,953 cás ó thuaidh den teorainn agus 52,256 cás ó dheas di.

2,489 duine a raibh an galar tolgtha acu atá básaithe ó thús na paindéime, 624 duine ó thuaidh agus 1,865 ó dheas.