Comórtas peile nua á reáchtáil do ghaelscoileanna Átha Cliath

Beidh na céadta dalta gaelscoile i bPáirc Parnell inniu mar chuid de chomórtas peile nua i mBaile Átha Cliath.

Glacfaidh 24 foireann ó ghaelscoileanna éagsúla sa phríomhchathair páirt i gComórtas Peile na nGael atá a eagrú ag CLG Átha Cliath i gcomhpháirt le Conradh na Gaeilge.

Díreoidh an comórtas i mbliana ar an bpeil agus ar dhaltaí atá i Rang a 5 agus Rang a 6, ach deir Cóilín Ó Cearbhaill, Oifigeach Gaeilge CLG Átha Cliath, gur mhian leo cur leis an gcomórtas má éiríonn go maith leis.

“Seo í an chéad uair dúinn é seo a dhéanamh agus tá sé á dhéanamh ar bhonn píolótach i mbliana ach tá féidearthachtaí ann cur leis amach anseo cinnte, i dtaobh níos mó scoileanna, féile iomána a fhorbairt agus mar sin de.”

Chomh maith leis an gcomórtas peile, beidh seó sorcais agus imeachtaí eile ar siúl i rith an lae.

Deir Ó Cearbhaill go bhfuil CLG Átha Cliath ag iarraidh go mbeadh comórtas ann d’fhoirne agus do scoileanna a bhaineann úsáid as an nGaeilge agus iad ar pháirc na himeartha. D’fhreastail cuid de na himreoirí is fearr ar fhoirne CLG Átha Cliath ar ghaelscoileanna agus deir Ó Cearbhaill go bhfuil súil aige go spreagfaidh an comórtas nua seo an chéad ghlúin eile.

“Tá go leor imreoirí as Áth Cliath a tháinig tríd an gcóras gaelscolaíochta ar nós Chiaráin Kilkenny, Jack McCaffrey, Liam Rushe, Emer Ní Eafa. B’fhéidir go mbeidh réalta peile an lae amárach le feiceáil ar Pháirc Parnell inniu.”