Comórtas Peile na Gaeltachta le filleadh ar Chonamara in 2020

Tá sé fógartha gurb iad cumann Naomh Anna in Leitir Móir, Co. na Gaillimhe, a bheidh ag óstáil Chomórtas Peile na Gaeltachta 2020.

Glacadh an cinneadh go bhfillfeadh an Comórtas ar Chonamara in 2020 ag cruinniú coiste an tseachtain seo. Ba iad na cumainn eile a bhí san iomaíocht ná an Cheathrú Rua agus Micheál Breathnach, ach ba iad Naomh Anna ba mhó a mheall na vótaí.

Uair amháin roimhe seo, in 2002, a reáchtáladh an comórtas náisiúnta i Leitir Móir agus deir Máirtín Ó Meachair, rúnaí Naomh Anna, gur mór an onóir dóibh go bhfuil sé ag teacht chucu arís.

“Is cinnte go bhfuil muid an-sásta leis. Bhí muid ag faire air le píosa,” a deir sé.

Deir Ó Meachair go bhfuil siad ag súil go mór le tabhairt faoin dúshlán atá rompu.

Ceann de na dúshláin is minice a bhíonn roimh chumainn agus iad ag reáchtáil an chomórtais ná go mbíonn orthu áiseanna nua a thógáil. Thapaigh roinnt cumann an deis le cúpla bliain anuas páirceanna agus hallaí spóirt nua a thógáil don chomórtas ach seans nach mbeidh sé sin ag teastáil ar Pháirc an Mháimín. I ndiaidh an chomórtais in 2002, thóg Naomh Anna ionad spóirt nua, Spórtlann Mhichael Mhóir, le taobh na páirce agus tá neart airgid caite acu ó shin chomh maith.

“Tá an Spórtlann san áit a raibh an ‘marquee’ in 2002. Is é an Spórtlann a tháinig in áit ollphuball nó ‘marquee’ an chomórtais. Chuir muid dromchla nua ar an bpáirc chomh maith le cúpla bliain anuas ar chostas mór, os cionn €80,000.”

Seans gur thug an infheistíocht sin buntáiste do Naomh Anna agus óstach 2020 á roghnú, ach deir Ó Meachair go mbeidh gach aon phingin ag teastáil uathu chun aire a thabhairt do na háiseanna sin agus chun réiteach faoi chomhair na sluaite a bheidh ag triall ar cheantar na n-oileán faoi cheann trí bliana.

“Is féidir an comórtas a chur i gcomparáid leis an Oireachtas mar cheann de mhór-ócáidí na Gaeilge. Tá a lucht leanúna féin ag an gcomórtas agus ag méadú atá an lucht leanúna sin gach bliain,” a deir sé.

“Tagann daoine ó na ceantair Ghaeltachta uile agus ó áiteanna eile sa tír. Tagann siad thar sáile, fiú. Nuair a bhí an comórtas i Leitir Móir in 2002, tháinig daoine anall as Meiriceá agus as Sasana mar go raibh an comórtas ar siúl ina gceantar féin.

“Is imeacht sóisialta é an comórtas chomh maith le coimhlint pheile. Bíonn chuile cheann éagsúil agus fágann gach ceann a mharc,” a deir Máirtín Ó Meachair, rúnaí Naomh Anna.

Faoin am a gcuirfear tús leis an gcomórtas i Leitir Móir in 2020, beidh sé bliana caite ón uair dheireanach a reáchtáladh é i gConamara. (I Maigh Cuilinn a bhí sé in 2014.)

Is i Maigh Eo a bheidh Comórtas Peile na Gaeltachta i mbliana agus na babhtaí ceannais á reáchtáil i dTuar Mhic Éadaigh idir an 2 agus an 5 Meitheamh.

Is iad Na Dúnaibh (Dún na nGall), An Ghaeltacht (Ciarraí) agus Naomh Muire (Ciarraí) atá roghnaithe mar óstaigh do 2018, 2019 agus 2021 faoi seach.