Comhaontú á shíniú ag TG4 le comhlacht teilifíse sa Chóiré Theas

Tá comhaontú déanta ag TG4 le comhlacht teilifíse sa Chóiré Theas d’fhonn “caidreamh leanúnach” a bhunú idir Éire agus an tír sin i dtaobh léiriúchán a fhorbairt.

D’fhógair lucht an stáisiúin Ghaeilge tráthnóna go bhfuil meamram tuisceana le síniú inniu acu le Jeonju Television (JTV), meamram a bhfuil sé mar aidhm aige “cláir agus ábhar den scoth a mhalartú, ábhar cruthaitheach a chomhléiriú, tacú le hiarrachtaí margaíochta agus forbairt a dhéanamh ar acmhainní daonna sa dá thír”.

Bhí ionadaithe ó JTV agus an Korean Communications Agency, an t-údarás a dhéanann maoiniú ar chraoltóir poiblí na Cóiré Theas, i gConamara le dhá lá anuas agus cuairt á tabhairt acu ar TG4, Údarás na Gaeltachta agus roinnt comhlachtaí neamhspleácha. 

Rinne S4C na Breataine Bige a mhacasamhail de shocrú le JTV tamall de bhlianta ó shin.

Dúirt Ardstiúrthóir TG4, Alan Esslemont gur cuid an socrú nua den “straitéis atá ag TG4 chun an tionscal cruthaitheach in Éirinn a fhorbairt”.

“Tá sé fíorthábhachtach do TG4 go mbeadh fás agus forbairt á dhéanamh ar an earnáil léiriúchán neamhspleách, go háirithe sna réigiúin. Tá fócas faoi leith ag TG4 ar chláir agus ar sheirbhísí a choimisiúnú ó chuideachtaí a fheidhmíonn trí Ghaeilge. Tá cuid mhaith acu seo lonnaithe sna réigiúin agus sna ceantair Ghaeltachta ach go háirithe,” arsa Alan Esslemont.

Dúirt Esslemont go gcabhródh an socrú le comhlacht na Cóiré Theas leis an earnáil neamhspleách teilifíse.

“Beidh deiseanna ann scileanna agus cumais daoine aonair a fhorbairt agus pobal idirnáisiúnta a aimsiú d’ábhar atá á chruthú in Éirinn freisin.

“Tá áthas ar TG4 go bhfuil Údarás na Gaeltachta ag tacú leis an tionscadal seo agus go bhfuil siadsan sásta cabhair agus comhairle a chur ar fáil do na comhlachtaí Gaeltachta a bheidh páirteach sa phróiseas.”